وزیر تعلیم پنجاب ڈاکٹر مراد راس نے کہا ہے کہ ٹیکنالوجی کی مدد سے اساتذہ کے لئے مزید آسانیاں پیدا کرنے جا رہے ہیں۔

تفصیلات کے مطابق وزیر تعلیم پنجاب ڈاکٹر مراد راس کی زیر صدارت اساتذہ کی زندگی ڈیجیٹلائیزیشن کے ذریعے مزید آسان بنانے کے حوالے سے اجلاس منعقد ہوا جس میں سیکرٹری اسکول ایجوکیشن، نمائندہ پی آئی ٹی بی و دیگر شریک ہوئے۔

وزیر تعلیم پنجاب ڈاکٹر مراد راس نے اجلاس کی صدارت کرتے ہوئے کہا کہ اگلے ایک مہینے کے دوران ٹیکنالوجی کی مدد سے اساتذہ کے لئے مزید آسانیاں پیدا کرنے جا رہے ہیں، اساتذہ کو مزید فراہم کی جانے والی آن لائن سہولیات کا اعلان جلد کیا جائے گا۔

ڈاکٹر مراد راس نے کہا کہ وزیر اعظم عمران خان کے ڈیجیٹل پاکستان کے ویثزن کے عین مطابق محکمہ تعلیم پنجاب کو مکمل طور پر ڈیجٹلائیز کیا جا رہا ہے۔

وزیر تعلیم پنجاب نے یہ بھی کہا کہ اساتذہ کی مکمل اور بھرپور توجہ محض ہمارے بچوں کو بہتر سے بہتر تعلیم فراہم کرنے پر مرکوز ہونی چاہیے۔

ڈاکٹر مراد راس نے مزید کہا کہ ٹیکنالوجی کے استعمال کی بدولت جو آسانیاں اساتذہ کے لئے موجودہ دور حکومت میں پیدا کی گئی ہیں ان کی ماضی میں کوئی مثال نہیں ملتی۔

وزیر تعلیم پنجاب ڈاکٹر مراد راس نے مزید کہا کہ ٹیکنالوجی کا بھرپور اور جامع استعمال شفافیت کو بڑے پیمانے پر یقینی بناتا ہے۔