وزیراعلیٰ پنجاب کی معاون خصوصی برائے اطلاعات ڈاکٹر فردوس عاشق اعوان نے کہا ہے کہ کچھ عدالتی مجرم اور بھگوڑے پاکستان کی جگ ہنسائی کا باعث بن رہےہیں۔

تفصیلات کے مطابق وزیراعلیٰ پنجاب کی معاون خصوصی برائے اطلاعات ڈاکٹر فردوس عاشق اعوان نے سماجی رابطے کی ویب سائٹ ٹویٹر پر اپنے ایک پیغام میں کہا کہ ملکی معاملات میں غیر ملکی قوتوں کی مداخلت کی کوئی گنجائش نہیں، وزیراعظم نے اس کاعملی مظاہرہ امریکا کو اپنی سرزمین نہ دینےکے اعلان سےکیا۔

ملکی معاملات میں غیر ملکی قوتوں کی مداخلت کی کوئی گنجائش نہیں! اسکا عملی مظاہرہ وزیراعظم نے امریکہ کو اپنی سرزمین نہ دینے کے اعلان سے کیا! دنیا بھر میں وزیر اعظم عمران خان کی بہادری اور امریکہ سے متعلق تگڑا موقف لینے کا چرچا ہے۔ لیکن اپوزیشن کو اس پر بھی سانپ سونگھ گیا ہے۔

— Dr. Firdous Ashiq Awan (@Dr_FirdousPTI) June 27, 2021

اپنے پیغام میں وزیراعلیٰ پنجاب کی معاون خصوصی نے کہا کہ دنیا بھر میں وزیر اعظم عمران خان کی بہادری اور امریکا سے متعلق تگڑا مؤقف لینے کا چرچا ہے لیکن اپوزیشن کو اس پر بھی سانپ سونگھ گیا ہے۔

ڈاکٹر فردوس عاشق اعوان نے یہ بھی کہا کہ اپوزیشن اپنی خفت مٹانے کیلئے نیا بیانیہ گھڑ رہی ہے جبکہ کچھ عدالتی مجرم اور بھگوڑے پاکستان کی جگ ہنسائی کاباعث بن رہے ہیں۔

وزیراعلیٰ پنجاب کی معاون خصوصی برائے اطلاعات ڈاکٹر فردوس عاشق اعوان نے مزید کہا کہ پاکستان عمران خان کی قیادت میں کھویا ہوا تشخص پھر حاصل کر رہا ہے۔ عالمی سطح پر پاکستان عزت ووقار کا مقام دوبارہ حاصل کررہا ہے۔