وزیرخارجہ مخدوم شاہ محمود قریشی نے کہا ہے کہ پاکستان آزربائیجان کے ساتھ کثیرالجہتی شعبہ جات میں دو طرفہ تعاون کے فروغ کیلئے پر عزم ہے۔

تفصیلات کے مطابق پاکستان میں تعینات آزربائیجان کے سفیر علی علی زادہ کی وزارتِ خارجہ میں وزیرخارجہ مخدوم شاہ محمود قریشی سے الوداعی ملاقات ہوئی۔

ملاقات میں وزیر خارجہ نے آزربائیجان کے سفیر علی علی زادہ کیلئے نیک خواہشات کا اظہار کیا جس پر انھوں نے وزیر خارجہ کا شکریہ ادا کیا۔

[amazonad category=”Mobile”]

اس موقع پر وزیرخارجہ مخدوم شاہ محمود قریشی نے پاکستان اور آزربائیجان کے مابین دو طرفہ برادرانہ تعلقات کو سراہا جبکہ وزیر خارجہ نے دو طرفہ تعلقات کو مستحکم بنانے کیلئے آزربائیجان کے سفیر علی علی زادہ کی خدمات کی بھی تعریف کی۔

وزیرخارجہ مخدوم شاہ محمود قریشی نے نوگورنوکارا باخ کے مسئلے پر پاکستان کی حمایت کا حوالہ دیتے ہوئے، متاثرہ علاقوں کی تعمیر نو اور بحالی کیلئے پاکستان کی جانب سے ہر ممکن تعاون کی یقین دہانی کروائی۔

شاہ محمود قریشی نے کہا کہ پاکستان اور آزربائیجان کے مابین تجارت، کامرس، اور توانائی کے شعبوں میں دو طرفہ تعاون کے وسیع مواقع موجود ہیں۔

وزیرخارجہ مخدوم شاہ محمود قریشی نے مزید کہا کہ دونوں ممالک کے مابین اعلیٰ سطحی روابط کا فروغ خوش آئند ہے، پاکستان آزربائیجان کے ساتھ کثیرالجہتی شعبہ جات میں دو طرفہ تعاون کے فروغ کیلئے پر عزم ہے۔