فرخ حبیب کا کہنا ہے عمران خان دنیا میں کشمیر کی آواز ہے۔

تفصیلات کے مطابق وزیر مملکت اطلاعات فرخ حبیب نے الیکشن کمیشن کے باہر میڈیا سے گفتگو کرتے ہوئے کہا ہے کہ مسلم لیگ ن اور پیپلز پارٹی کی فارن فنڈنگ کیس سکروٹنی کمیٹی کے سامنے زیر سماعت ہے، تحریک انصاف نے درخواست دائر کی کہ ہمیں بھی دونوں جماعتوں کے دستاویزات کی جانچ پڑتال کا موقع دیا جائے۔

ان کا کہنا ہے کہ ایک دوسرے کیس میں الیکشن کمیشن نے فریق کو جانچ پڑتال کی اجازت دی ہے، ن لیگ 2017 سے اپنی فارن فنڈنگ کا ریکارڈ جمع نہیں کراسکی ہے، مسلم لیگ ن نے 12 اور پیپلز پارٹی نے 7 اکاؤنٹس چھپائے ہیں جبکہ تحریک انصاف نے  40 ہزار دستاویزات جمع کرائیں ہیں۔

 فرخ حبیب نے سوال پوچھتے ہوئے کہا ہے کہ پارٹی اکاؤنٹس منی لانڈرنگ اور کک بیکس کے لئے استعمال ہوئے؟ دونوں جماعتیں آئینی ادارے میں کیوں جواب نہیں دیتیں؟ مارک سیگل کو کہاں سے پیپلز پارٹی نے رقوم ادا کیں؟، شہید بے نظیر نے اپنی کتاب میں لکھا کہ ن لیگ نے اسامہ بن لادن سے پیسے لئے تھے۔

ان کا کہنا ہے کہ آج یوم شہداء کشمیر ہے کشمیری ڈوگرا افواج کے خلاف کھڑے ہوئے، کچھ بہروپئے کشمیر کے دورے پر ہیں کشمیر جاتی ہیں تو کشمیر ، سوات جائیں تو سوات کی بیٹی بن جاتی ہیں، محترمہ سندھ گئی تو زرداری کی بیٹی بن گئی، اپنی شادی پر مودی کو خصوصی دعوت پر بلا لیتے ہیں  اور حریت رہنماؤں کو بھول جاتے ہیں، مودی کو خوش کرنے کے لئے نواز شریف حریت رہنماؤں کو نہ ملے جندال اور بھارتی اداکاروں کو ملے اور کلبھوشن کا نام لیتے نواز شریف کو شرم آتی ہے۔

سابق وزیراعظم نے مزید کہا ہے کہ کشمیریوں کو معلوم ہے عمران خان انکا وکیل ہے، کشمیر انتخابات میں کشمیری عوام اپنے سچے حامیوں کو ووٹ دینگے، سکروٹنی کمیٹی پر عدم اعتماد کا اظہار نہیں کررہے صرف دستاویزات کی جانچ پڑتال چاہتے ہیں، فیکٹ فائنڈنگ رپورٹ سکروٹنی کمیٹی نے دینی ہے اکبر ایس بابر نے نہیں ہے بلکہ اکبر ایس بابر ن لیگ کے ایزی لوڈ پر چل رہے ہیں، اکبر ایس بابر کے پاس کچھ نہیں فیکٹ فائنڈنگ رپورٹ ایزی لوڈ کا نیا ذریعہ ہے۔