سعودی عرب کے سفیر نواف بن سعید المالکی نے کہا ہے کہ پاکستان سعودی عرب کیلئے ایک انتہائی اہم ملک ہے۔

تفصیلات کے مطابق چیئرمین سینیٹ محمد صادق سنجرانی سے سعودی عرب کے سفیر نواف بن سعید المالکی کی پارلیمنٹ ہاؤ س میں ملاقات ہوئی جس میں باہمی دلچپسی کے امور اور خاص طور پر خطے کی مجموعی صورتحال پر تفصیلی تبادلہ خیال کیا گیا۔

[amazonad category=”Mobile”]

چیئرمین سینیٹ نے کہا کہ پاکستان سعودی عرب کے مابین برادرانہ تعلقات باہمی اعتماد اور محبت کے لازوال رشتے سے جڑے ہیں۔

 محمد صادق سنجرانی نے یہ بھی کہا کہ دونوں ممالک کے تعلقات کی بنیاد مابین مذہبی، تاریخی، ثقافتی اور سماجی مماثلتوں پر ہے۔

چیئرمین سینیٹ کا کہنا تھا کہ عوام اور حکومت پاکستان کے دل خادم ال حرمین شریفین اور سعودی قیادت کے لیے بے پناہ احترام ہے جبکہ ہم مسلم اُمہ کے قائد کی حیثیت سے سعودی مملکت کے کردار کو بھی سراہتے ہیں۔

 محمد صادق سنجرانی کا یہ بھی کہنا تھا کہ پاکستان سعودی عرب کی خود مختاری اور علاقائی سالمیت کو  درپیش کسی بھی خطرے کے خلاف سعودی عرب کے ساتھ کندھے سے کندھا ملا کر کھڑا ہے۔

چیئرمین سینیٹ نے کہا کہ سعودی قیادت کی سرپرستی میں شروع کردہ خلیجی ریاستوں کے مابین تعلقات کی بحالی علاقائی امن کے لیے سعودی کاوشوں کا ثبوت ہے۔

محمد صادق سنجرانی نے یہ بھی کہا کہ دونوں ممالک نے ہر اہم فورم پر ایک دوسرے کے موقف کی ہمیشہ حمایت کی ہے۔دونوں ممالک کے مابین تجارت اور سرمایہ کاری کے شعبوں میں دوطرفہ تعاون کو فروغ دینے کیلئے وسیع گنجائش موجود ہے۔

چیئرمین سینیٹ کا کہنا تھا کہ سعودی عرب میں مقیم پاکستانیوں کے مسائل کے حل کیلئے سعودی قیادت کا کردار قابل تحسین ہے جبکہ سعودی عرب کی جانب سے ایف اے ٹی ایف میں پاکستان کی مسلسل حمایت پر بھی شکریہ ادا کرتے ہیں۔

 محمد صادق سنجرانی کا یہ بھی کہنا تھا کہ سعودی سرمایہ کار پاکستان میں تجارت اور سرمایہ کاری سے بھر پور استفادہ حاصل کریں، سی پیک خطے کیلئے مستقبل کا گیم چینجر ثابت ہوگا۔

چیئرمین سینیٹ محمد صادق سنجرانی کا مزید کہنا تھا کہ پاکستانیوں کی کثیر تعداد سعودی عرب کی ترقی میں اہم کردار ادا کر رہی ہے، ادارہ جاتی سطح پر پارلیمانی وفود کے تبادلوں میں مزید تیزی لانے کی ضرورت ہے۔

ملاقات میں سعودی عرب کے سفیر نواف بن سعید المالکی نے کہا کہ پاکستان کے ساتھ برادرانہ تعلقات انتہائی اہمیت کے حامل ہیں۔

سعودی عرب کے سفیر نے کہا کہ سعودی عرب کی جانب سے پاکستان میں وسیع سرمایہ کاری پاکستان پر اعتماد کا اظہار ہے۔

نواف بن سعید المالکی نے یہ بھی کہا کہ پاکستان سعودی عرب کیلئے ایک انتہائی اہم ملک ہے، باہمی تعلقات کی مضبوطی سے حالات بہتری کی جانب گامزن ہیں۔

سعودی سفیر نواف بن سعید المالکی نے مزید کہا کہ پاکستان کی ایوان بالاء اور سعودی شوریٰ کونسل کے مابین ادارہ جاتی تعاون پر مزید پیش رفت ہونی چاہیے، پاکستان میں موجود سرمایہ کاری کے وسیع مواقع سے استفادہ حاصل کیا جائے گا-