وزیراعلیٰ بلوچستان جام کمال خان نے کہا ہے کہ پسماندگی کا خاتمہ اولین ترجیح ہے۔

تفصیلات کے مطابق وزیراعلیٰ بلوچستان جام کمال خان نے کوئٹہ میں میڈیا سے بات چیت کرتے ہوئے کہا کہ بلوچستان میں سہولیات کے فقدان ، پسماندگی ، غربت ، ترقی نہ ہونے اور دیگر معاملات پر بھی ناراضگی یا عوام کو تحفظات ہیں۔

جام کمال خان نے کہا کہ عام آدمی کے مسائل دور کرنے اور بہتر معیار زندگی فراہم کرنے کیلئے وفاق کے ساتھ مل کر کام کررہے ہیں۔

وزیراعلیٰ بلوچستان نے یہ بھی کہا کہ بلوچستان کے بیشتر علاقہ ابھی بھی زندگی کی بنیادی سہولتوں سے محروم ہیں، بلوچستان حکومت محرومی کے احساس کو ختم کرنے کیلئے پر عزم ہے۔

جام کمال خان کا کہنا تھا کہ اپوزیشن کا کام تنقید ہے لیکن ہمیں بلوچستان اور پاکستان کی خوشحالی کیلئے ایک ہونا ہے  کیونکہ صوبے کی ترقی اور عام آدمی کی خوشحالی اپوزیشن اور حکومت دونوں کا مشن ہے۔

وزیراعلیٰ بلوچستان کا یہ بھی کہنا تھا کہ کہ 3 سال کے دوران صوبے کے تمام اضلاع میں یکساں ترقیاتی کام شروع کئے ، اپوزیشن کا پارلیمان میں واپس آنا خوش آئند ہے۔

جام کمال خان نے کہا کہ اسمبلی فلور سے اپوزیشن کی تنقید کو کھلے دل سے قبول کرتے ہیں، اپوزیشن کی تنقید سے ہی حکومت اپنی کارکردگی کو بہتر بناتی ہے۔

کورونا وائرس کی موجودہ صورتحال کے حوالے سے وزیراعلیٰ بلوچستان جام کمال خان نے لوگوں سے اپیل کی کہ موذی وائرس کے خلاف جنگ میں حکومت کا ساتھ دیں، کووڈ کے حوالے سے میڈیا موثر کردار ادا کرسکتا ہے۔