صدر مملکت ڈاکٹر عارف علوی نے کہا ہے کہ دنیا کی تیزی سے بدلتی صورتحال کے پیش نظر ملک کی سائبر سیکیورٹی مضبوط بنانے کے لئے موثر اقدامات کی ضرورت ہے

تفصیلات کے مطابق صدر مملکت ڈاکٹر عارف علوی کی زیر صدارت اجلاس ہوا جس میں یونیورسٹی انتظامیہ اور فیکلٹی کے سینئر ممبران نے شرکت کی۔

اجلاس میں وائس چانسلر ایئر یونیورسٹی ایئر مارشل ریٹائرڈ جاوید احمد نے صدر مملکت کو یونیورسٹی کی کارکردگی اور مختلف شعبوں میں معیاری تعلیم کی فراہمی کے سلسلے میں پیشرفت کے بارے میں بریفنگ دی۔

صدر مملکت ڈاکٹر عارف علوی نے اجلاس کی صدارت کرتے ہوئے ایئر یونیورسٹی کی کارکردگی اور مارکیٹ ضروریات کے مطابق طلباء کو معیاری تعلیم کی فراہمی کو سراہا۔

صدر مملکت ڈاکٹر عارف علوی نے دنیا کی تیزی سے بدلتی صورتحال کے پیش نظر ملک کی سائبر سیکیورٹی مضبوط بنانے کے لئے موثر اقدامات کی ضرورت پر زور دیتے ہوئے کہا ہے کہ ملکی جامعات مستقبل کے سلامتی سے متعلق چیلنجز کا مقابلہ کرنے کے لئے ابھرتی ہوئی جدید ٹیکنالوجیز پر توجہ دیں۔

ڈاکٹر عارف علوی نے اس بات پر زور دیا کہ جامعات انفارمیشن ٹیکنالوجی ، مصنوعی ذہانت ، کلاؤڈ کمپیوٹنگ اور بلاک چین ٹیکنالوجی کے فروغ کے لئے کام کریں۔

صدر مملکت نے کہا کہ اچھی شہرت کی حامل بین الاقوامی جامعات کی مہارت سے استفادہ کرنے کیلئے تعاون کو فروغ دیا جائے۔

ڈاکٹر عارف علوی نے اچھی شہرت کی حامل بین الاقوامی جامعات کی مہارت سے استفادہ کرنے کیلئے تعاون بڑھانے کی ضرورت پر زور دیا اور کہا کہ طلباء کی فکری صلاحیتوں میں اضافے کیلئے تنقیدی سوچ اور تجزیاتی مہارت پیدا کرنا بہت اہم ہے۔

صدر مملکت ڈاکٹر عارف علوی نے انفارمیشن ٹیکنالوجی کی اہمیت کو اجاگر کرتے ہوئے کہا کہ ملک میں آئی ٹی برآمدات بڑھانے کے لئے نوجوانوں کو ہنرمند بنانے کے لئے اقدامات کیے جارہے ہیں۔