وزیراعلیٰ پنجاب کی معاون خصوصی برائے اطلاعات فردوس عاشق اعوان نے کہا کہ وزیراعظم عمران خان کشمیریوں کی ترجمانی کا حق ادا کر رہے ہیں۔

تفصیلات کے مطابق وزیراعلیٰ پنجاب کی معاون خصوصی برائے اطلاعات فردوس عاشق اعوان نے مریم صفدر کے بیان پر ردعمل دیتے ہوئے کہا کہ جعلی راجکماری کشیمریوں پر ظلم ڈھانے والے مودی سے کس قدر متاثر ہے۔

فردوس عاشق اعوان نے کہا کہ کشمیری بہن بھائیوں پر ظلم و ستم کے پہاڑ ڈھانے والا مودی ن لیگ کے سر کا تاج ہے۔

معاون خصوصی برائے اطلاعات نے یہ بھی کہا کہ ظالم اور جابر مودی کو گھر بلانے پر جعلی راجکماری شادیانے بجا رہی ہے، مودی اور شریف خاندان کی ملک دشمنی کسی سے ڈھکی چھپی نہیں

فردوس عاشق اعوان کا کہنا تھا کہ پہلی مرتبہ مرد مجاہد کشمیریوں کے دل کی آواز عمران خان نے کشمیریوں کا مقدمہ موثر انداز میں لڑا۔

معاون خصوصی برائے اطلاعات کا یہ بھی کہنا تھا کہ وزیراعظم عمران خان نے کشمیریوں کا سفیر بن کر دنیا کے سوئے ضمیر کو جھنجھوڑا، پہلی مرتبہ مسئلہ کشمیر پر دنیا بیدار ہوئی اور مسلم دنیا بھی مسئلہ کشمیر پر ہم آواز ہوئی۔

فردوس عاشق اعوان کا یہ بھی کہنا تھا کہ وزیراعظم عمران خان نے مکار اور غاصب بھارت کا سیاہ چہرہ دنیا کے سامنے عیاں کیا، پہلی مرتبہ وزیراعظم عمران خان نے بھارت کو خارجہ پالیسی سمیت تمام محاذوں پر شکست فاش دی۔

وزیراعلیٰ پنجاب کی معاون خصوصی برائے اطلاعات نے کہا کہ وزیراعظم عمران خان نے خودی اور خودداری کے پیکر پاکستان کی بنیاد رکھ دی ہے۔

فردوس عاشق اعوان نے یہ بھی کہا کہ وزیر اعظم عمران خان وہ پاکستان بنا رہے ہیں جو قائد اور اقبال کے خوابوں کی عملی تعبیر ہے۔

وزیراعلیٰ پنجاب کی معاون خصوصی برائے اطلاعات فردوس عاشق اعوان نے مزید کہا کہ وزیراعظم عمران خان کی قیادت میں پاکستان جم کر ڈٹ کر کشمیری بہن بھائیوں کیساتھ کھڑا ہے، کشمیر کی آزادی تک کشمیری بہن بھائیوں کیساتھ شانہ بشانہ کھڑے رہیں گے۔