وزیراعظم عمران خان کی زیرصدارت وفاقی کابینہ کا اجلاس آج ہوگا۔

تفصیلات کے مطابق وفاقی کابینہ 20 نکاتی ایجنڈے پر غور کرے گی جبکہ اجلاس میں نیشنل سائبر سیکیورٹی پالیسی پیش کی جائے گی اور وفاقی کابینہ ایف آئی اے کے جرائم شیڈول میں نئے قوانین شامل کرنے کی منظوری بھی دے گی۔

چیئرمین سی ڈی اے اسلام آباد میں قائم تجاوزات کے خاتمے سے متعلق رپورٹ کابینہ کو پیش کریں گے جبکہ وفاقی کابینہ 2 ملزمان نسیم غوری اور غلام شبیر کو یو اے ای کے حوالے کرنے کی منظوری بھی دے گی۔

اسکے علاوہ وفاقی کابینہ کو الیکٹرانک ووٹنگ مشینوں اور اوورسیز پاکستانیوں کو ووٹنگ کا حق دینے پر بریفنگ دی جائے گی جبکہ کابینہ اجلاس میں غیر ضروری کاروباری ریگولیشن ختم کرنے کے لیے قانون کا ڈرافٹ بھی پیش کیا جائے گا۔

وفاقی کابینہ پاکستان ایگریکلچر ریسرچ کونسل کے بورڈ پر گورنرز کی تشکیل نو کی منظوری سمیت کابینہ ادارہ شماریات کے چیف اسٹیٹیشن کی تعیناتی کی منظوری بھی دے گی۔

واضح رہے کہ وفاقی کابینہ ای سی سی اور کابینہ کمیٹی برائے توانائی کے اجلاس کے فیصلوں کی توثیق کرے گی۔