چئیرمین سینیٹ محمدصادق سنجرانی نے پاکستان میں کیوبا کے سفیر سے پارلیمنٹ ہاوُس میں ملاقات کی ہے۔

تفصیلات کے ملاقات میں دوطرفہ تعلقات، علاقائی صورتحال اور باہمی دلچسپی کے امور پرتبادلہ خیال کیا گیا ہے۔

ملاقات میں چئیرمین سینیٹ صادق سنجرانی نے کہا ہے کہ  پاکستان کیوبا کے ساتھ تعلقات کو انتہائی قدر کی نگاہ سے دیکھتاہے، دونوں ممالک کے درمیان دہائیوں پرانے گہرے تعلقات کو معاشی اور پارلیمانی تعاون کے ذریعے نئی بلندیوں تک لے جانے کی ضرورت ہے۔

صادق سنجرانی کا کہنا ہے کہ دونوں ممالک کے مابین باہمی تعاون کو مزید فروغ دینے کیلئےدیگر مواقع تلاش کرنے کی ضرورت ہے۔

واضح رہے کہ چئیرمین سینیٹ محمد صادق سنجرانی نے صحت اور تعلیم کے شعبوں میں کیوبا کے تعاون کو سراہا ہےاور پاکستانی میڈیکل طلباءکے لئے کیوبا کے اسکالرشپ پروگرام کو بھی سراہا ہےاس کے علاوہ  ملاقات میں چئیرمین سینیٹ محمد صادق سنجرانی نے پاکستان میں قدرتی آفات خصوصاً 2005 کے زلزلےسے ہونے والی تباہی کے بعد کیوبا کی طبی امداد کی بھی تعریف کی ہے۔

انھوں نے کہا ہے کہ دونوں ممالک کو پارلیمان کے ذریعے دو طرفہ تعلقات کو مزید مضبوط بنانے کی ضرورت ہے، کیوبا پاکستان میں معاشی اور انسانی وسائل کی صلاحیت سے فائدہ اٹھانے کا خواہاں ہے، پاکستان میں سرمایہ کاری کیلئے ماحول انتہائی سازگار ہے، سرمایہ کاردوست پالیسیوں سے کیوبا کو بھی فائدہ اٹھانا چاہئے۔

صادق سنجرانی کا کہنا ہے کہ کیوبا کیلئے توانائی ، تجارت ، زراعت اور فشری شعبوں میں سرمایہ کاری کے مواقع موجود ہیں، پاکستان تجارت، صحت اور ثقافت کے شعبوں میں کیوبا کے ساتھ تعلقات کو مزید فروغ دینے کا خواہاں ہے، پاکستان خطے میں امن اور استحکام کو فروغ دینے کیلئے پرعزم ہے۔

چئیرمین سینیٹ نے کیوبا کی طرف سے پاکستان کیلئے سفیر بننے پر مبارکباد پیش کرتے ہوئے کہا ہے کہ امید کرتا ہوں کہ آپکی پاکستان میں موجودگی سے دونوں ممالک کے تعلقات مزید مستحکم ہوں گے۔

اس کے علاوہ ملاقات میں چئیرمین سینیٹ نے کیوبا میں کورونا سے ہونی والی ہلاکتوں پر افسوس کا اظہار کرتے ہوئے کہا ہے کہ کیوبا نے کورونا کی روک تھام کیلئے موثر اقدامات اٹھائے اور امید ہے کہ بہت جلد کیوبا کی حکومت اس وبا پر قابو پا لے گی۔

واضح رہے کہ 27 فروری 2017 کو چئیرمین سینیٹ کے دورہ کیوبا کے دوران پارلیمانی امور کو مستحکم کرنے کیلئے مفاہمتی یاداشت پر دستخط کئے گئے تھے۔

ان کا ملاقات میں کہنا ہے کہ مفاہمتی یاداشت ،سینیٹ آف پاکستان اور پیپلز پاور ریپبلک آف کیوبا کے مابین تعلقات کو مزید فروغ دینے میں اہم کردار ادا کرتا ہے، دونوں ممالک کو حقیقی معنوں میں مفاہمتی یاداشت پر عمل درآمد کو یقینی بنانے کی ضرورت ہے۔

صادق سنجرانی نے کہا ہے کہ وبا کی صورتحال بہتر ہونے کے بعد کیوبا کی ہارلیمنٹیرینز کے دورہ پاکستان کے منتظر ہیں، ایک ملین ڈالر کی موجودہ تجارتی حجم دونوں ممالک کے مابین تجارت کی حقیقی صلاحیت کے مطابق نہیں ہے، کیوبا سے تربیت یافتہ پاکستانی ڈاکٹرز ملک میں صحت کے شعبوں میں خدمات سرانجام دے رہے ہیں۔

انھوں نے ملاقات میں مزید کہا ہے کہ بھارت کے 5 اگست کے بعد کے اقدامات اور مقبوضہ جموں و کشمیر کا جغرافیہ تبدیل کرنے کی کوشش اقوام متحدہ کی قراردادوں اور بین الاقوامی قوانین کی خلاف ورزی ہے، بھارت کو فوری طور پر مقبوضہ کشمیر میں کرفیو، معصوم کشمیریوں پر لگائی گئی پابندیوں کو ختم کرنا چاہئے اور بھارت فوری طور پر قیدیوں کو رہا کرے اور اقوام متحدہ کی قراردادوں کے مطابق مقبوضہ کشمیر کے تنازعے کو حل کرے۔

دوسری جانب کیوبن سفیر نے ملاقات میں کہا ہے کہ کیوبا بھی پاکستان کے ساتھ اپنے تعلقات کو انتہائی اہمیت دیتا ہے، پارلیمانی روابط کو مزید مستحکم کرنے کیلئے کیوبا کی قومی اسمبلی میں فرینڈشپ گروپ بھی قائم کیا گیا ہے، کیوبا کے بزنس مین پاکستان میں سرمایہ کاری کے خواہش مند ہیں۔