وفاقی وزیر اطلاعات و نشریات فواد چوہدری نے کہا ہے کہ وزیراعظم عمران خان کشمیر کے سفیر ہیں۔

تفصیلات کے مطابق اپنے ایک بیان میں وفاقی وزیر اطلاعات و نشریات فواد چوہدری نے مریم نواز اور بلاول بھٹو زرداری کو سیاسی طور پر طفل مکتب قرار دیا ہے۔

وفاقی وزیر اطلاعات و نشریات نے کہا کہ وزیراعظم نے کشمیر کے مسئلہ پر عالمی خاموشی توڑی، عمران خان نے او آئی سی، یو این اور پوری دنیا میں کشمیر پر آواز بلند کی۔

[amazonad category=”Mobile”]

فواد چوہدری نے یہ بھی کہا کہ مریم نواز اور بلاول بھٹو زرداری کی سیاست کا نہ تو کوئی نظریہ ہے اور نہ ہی کوئی مقصد ہے۔

وفاقی وزیر اطلاعات و نشریات کا کہنا تھا کہ مریم نواز اور بلاول بھٹو کو کشمیر کی تاریخ اور عوام کی جدوجہد کا کچھ پتا ہی نہیں۔

فواد چوہدری کا یہ بھی کہنا تھا کہ مریم نواز اور بلاول بھٹو کے والدین پاکستان کے اربوں روپے لوٹنے کے مقدمات میں ملوث اور مفرور ہیں۔

وفاقی وزیر اطلاعات و نشریات نے کہا کہ ان کی تقریروں سے بھی پتہ نہیں چل رہا کہ وہ کہنا کیا چاہ رہے ہیں، 30، 30 سال حکومت کرنے والوں کو پتا نہیں کہ ان کی پالیسی کیا ہے۔

فواد چوہدری نے یہ بھی کہا کہ بہتر ہوتا جلسوں میں اپنی کارکردگی بتاتے لیکن انہوں نے سیاسی طعنوں کی محفل برپا کردی ہے۔

وفاقی وزیر اطلاعات و نشریات فواد چوہدری نے مزید کہا کہ جن کا پیسہ بیرون ملک ہو، وہ کیسے پاکستان کے نظریے کی حفاظت کریں گے، آزاد کشمیر میں دونوں پارٹیوں نے 10 سال حکومت کی، کارکردگی صفر دکھائی۔