وزیراعلیٰ سندھ مراد علی شاہ نے کہا ہے کہ شہر کراچی سے صفائی کے کام کی مانیٹرنگ ایس ایس ڈبلیو ایم بی کی ذمہ داری ہے۔

تفصیلات کے مطابق وزیراعلیٰ سندھ مراد علی شاہ کی صدارت میں سندھ سولڈ ویسٹ مینجمنٹ بورڈ، اسپین اور چین کی کمپنیوں کے درمیان ضلع وسطی اور کورنگی میں صفائی کا کام شروع کرنے کی تقریب ہوئی۔

ترجمان وزیراعلیٰ سندھ کے مطابق کراچی کے ضلع کورنگی اور وسطی میں صفائی کے لئے اسپین اور چین کی کمپنیوں سے معاہدہ طے پاگیا ، دونوں کمپنیاں اگست کے دوسرے ہفتے سے صفائی کا کام شروع کریں گی اور اس معاہدے کے بعد پورے کراچی کی صفائی کا کام آؤٹ سورس ہوجائے گا۔

ترجمان وزیراعلیٰ سندھ کا مزید کہنا تھا کہ چینی کمپنی کورنگی اور اسپین کی کمپنی ضلع وسطی میں کام کریں گی جبکہ چینی کمپنی صفائی ستھرائی کا پلانٹ اور 40 میگا واٹ کا کچرے سے بجلی پیدا کرنے کا پاور پلانٹ بھی لگائے گی۔

اس موقع پر وزیراعلیٰ سندھ نے کہا کہ شہر کراچی سے صفائی کے کام کی مانیٹرنگ ایس ایس ڈبلیو ایم بی کی ذمہ داری ہے، اب پورے شہر کے میونسپل علاقے سے سولڈ ویسٹ کی کلیکشن اور ڈمپنگ ہوگی۔

واضح رہے اس سے قبل 2017 میں ضلع غربی، کیماڑی اور ملیر میں کام شروع ہوا تھا۔ کام شروع کرنے کے معاہدہ پر ایس ایس ڈبلیو ایم بی کے ایم ڈی زبیر چنہ اور سی ای او اوبرسر جیمی مارٹن نے دستخط کیے۔