مسلم لیگ ن کے رہنما عطا اللہ تارڑ نے کہا کہ مسلم لیگ ن کی پی پی 38 میں پوزیشن انتہائی مضبوط ہے۔

تفصیلات کے مطابق مسلم لیگ ن کے رہنما عطا اللہ تارڑ نے سیالکوٹ میں میڈیا سے گفتگو کرتے ہوئے کہا کہ وریو خاندان کی خدمات کا لوگ احساس کرتے ہیں، 2018 میں اس حلقے میں ہم نے 17 ہزار کی لیڈ سے الیکشن جیتا تھا۔

انہوں نے کہا کہ سیالکوٹ کی باجی کو باجی بدزبان کا لقب دیا ہے، باجی کو اتنا شوق تھا تو خود الیکشن لڑ کے دیکھ لیتیں، سیالکوٹ میں بیٹھ کر باجی بدزبان کو مناظرے کا چیلنج دیتا ہوں، باجی نے نواز شریف کے ترلے کیے کہ مجھے ن لیگ میں شامل کر لیں، ڈار برادران اور فردوس باجی پی پی 38 کے امیدوار کے ساتھ نہیں چل رہیں، وزیر اعلیٰ کے پرنسپل سیکرٹری طاہر خورشید سیاسی مداخلت سے باز رہیں۔

عطا اللہ تارڑ نے کہا کہ ڈاکٹر فردوس اپنی حد میں رہیں، اگر فردوس عاشق حلقے میں نظر آئیں تو کوئی لحاظ نہیں کیا جائے گا، پی پی 38 کے الیکشن کے لیے ڈسکہ سے 10 گنا زیادہ تیاری کر لی ہے۔

مسلم لیگ ن کے رہنما نے کہا کہ پیٹرول مہنگا ہونے سے مہنگائی میں مزید اضافہ ہو گیا ہے، لوگ آج پرانے پاکستان کو یاد کر رہے ہیں، باجی بدزبان بتائیں کہ اس عوام کے لئے کیا خدمات ہیں، پورے آزاد کشمیر میں شیر کا زور ہے۔

عطا اللہ تارڑ نے کہا کہ اگر طاہر خورشید نے رات کے اندھیروں میں سیالکوٹ آنا بند نہ کیا تو 7 کلب روڈ پر احتجاج کریں گے، ہم نے الیکشن ڈے کے حوالے سے مکمل پلاننگ کر لی ہے۔

مسلم لیگ ن کے رہنما عطا اللہ تارڑ نے مزید کہا کہ ڈاکٹر فردوس نے پی پی 38 کے ووٹرز کی توہین کی ہے، اگر میری گاڑی میں سے کوئی بریف کیس نکلا تو ہر سزا بھگتنے کو تیار ہوں، اگر بریف کیس نہیں نکلا تو پھر ڈاکٹر فردوس عاشق وریو ہاؤس میں آ کر معافی مانگیں۔