وزیر داخلہ شیخ رشید احمد نے کہا کہ پاکستان نے ازبکستان کے شہریوں کیلئے ویزے میں خصوصی سہولیات دی ہیں۔

تفصیلات کے مطابق وزیر داخلہ شیخ رشید احمد نے ازبکستان کے سفیرعزت مآب اویبک عارف عثمانووسے ملاقات کی جس میں پاکستان اور ازبکستان کے دو طرفہ تعلقات کے فروغ سمیت باہمی دلچسپی کے امور پر بات چیت ہوئی۔

واضح رہے کہ پاکستان اور ازبکستان کے درمیان ویزے کے معاہدوں پر پیشرفت کا جائزہ لیا گیا اور دونوں ملکوں کے درمیان تجارت اور سیاحت کے فروغ پر بھی بات چیت ہوئی، دونوں ملکوں کے درمیان قانون نافذ کرنے والے اداروں کے درمیان روابط کو بڑھانے پراتفاق قائم کیا۔

وزیر داخلہ نے کہا کہ پاکستان اور ازبکستان کے درمیان قدیم مذہبی اور ثفافتی تعلقات قائم ہیں، ازبکستان عظیم اسلامی ورثے کا امین ملک ہے۔

انہوں نے مزید کہا کہ اسلامی رشتے سے جڑے دونوں ملکوں کے درمیان روابط کو مزید مضبوط کرنے کی ضرورت ہے، ازبک شہریوں کو پاکستان آمد کے لئے اب 5 دن کا ٹرانزٹ ویزا بھی جاری کیا جائے گا۔

دوسری جانب ازبک سفیر کا کہنا ہے کہ لاہور اور تاشقند کے درمیان پی آئی اے کی پرواز دو جولائی سے بحال ہوچکی ہے، ہوائی سفر کی سہولت سے دونوں ملکوں کے درمیان سیاحت اورکاروبار کو فروغ ملے گا، ویزہ سہولیات کے معاہدے پر عملدآمد سے روابط میں مزید اضافہ ہوگا۔