صدر مملکت ڈاکٹر عارف علوی نے کہا ہے کہ پاکستانی کمیونٹی سعودی عرب کی سماجی و معاشی ترقی میں اہم کردار ادا کررہی ہے۔

تفصیلات کے مطابق صدر مملکت ڈاکٹر عارف علوی سے پاکستان میں سعودی عرب کے سفیر نواف بن سعید المالکی کی ملاقات ہوئی۔

ملاقات میں صدر مملکت ڈاکٹر عارف علوی نے مشکل وقتوں میں پاکستان کی مددکرنے پر سعودی عرب کے تعاون کو سراہا جبکہ صدر مملکت نے اسلامی دنیا میں اتحاد کے فروغ ، علاقائی اور بین الاقوامی امن و سلامتی کے لئے سعودی کوششوں کو بھی سراہا۔

[amazonad category=”Mobile”]

ڈاکٹر عارف علوی نے کہا کہ پاکستان اور سعودی عرب کے مابین اقتصادی اور سرمایہ کاری کے تعاون کو مزید مستحکم کرنے کی ضرورت ہے۔

صدر مملکت نے یہ بھی کہا کہ دونوں ممالک کے مابین مشترکہ عقیدے ، ثقافت ، روایت اور باہمی خیر سگالی کی بنیاد پر برادرانہ تعلقات ہیں۔

ڈاکٹر عارف علوی کا کہنا تھا کہ دونوں ممالک کے مشترکہ مفاد کے لئے باہمی تعلقات کو وسعت دینے کی ضرورت ہے۔

صدر مملکت کا یہ بھی کہنا تھا کہ پاکستان توانائی ، سائنس ، ٹیکنالوجی ، زراعت اور ثقافت سمیت باہمی دلچسپی کے تمام شعبوں میں تعاون کا خواہاں ہے۔ امید ہے کہ سعودی حکومت پاکستانی شہریوں پر سفری پابندیوں میں آسانی پیدا کرے گی ۔

ڈاکٹر عارف علوی نے کہا کہ پاکستانی عوام اور حکومت خادمینِ حرمین شریفین اور سعودی عرب کی قیادت کو احترام کی نگاہ سے دیکھتے ہیں۔

صدر مملکت ڈاکٹر عارف علوی نے مزید کہا کہ پاکستان ادارہ جاتی روابط کی مدد سے میڈیا اور ثقافت کے میدان میں دوطرفہ تعلقات کو وسعت دینا چاہتا ہے۔

ملاقات میں سعودی سفیر نے کہا کہ برادر ممالک کے مابین معیشت ، تجارت اور ثقافت کے شعبوں میں تعاون کو فروغ دینے کی ضرورت ہے۔