جنگ زدہ ملک شام کے میوزک بینڈ  سفر نے بجلی کا استعمال کیے بغیر ایک نئی میوزک ویڈیو ریلیز کی جو احساسِ محبت اور دردِ دل پر مبنی ایک عربی گانا ہے ۔

شام کے اس بینڈ کی یہ مکمل اندھیرے میں بنائی گئی میوزک ویڈیو کو سوشل میڈیا پر صارفین نے بہت پسند کیا  اور ابھی تک اس ویڈیو کو 6 ملین سے زائد ویوز مل چکے ہیں ۔

دمشق میں معاشی صورتحال اب دہائیوں پرانے تنازع کے جاری رہنے اور دورِ حاضر میں عروج پر ہونے کی وجہ سے پہلے سے بھی بدتر ہوگئی ہے ، جسکی وجہ سے شام کے کئی حصّے تباہی اور بدحالی کا شکار ہیں اور ایسے حالات میں بجلی کی سہولت شام کے لوگوں کے لئے ایک نایاب شے بن چکی ہے۔

جب گلوکار شادی صفادی اور بینڈ نے مل کر ایک کم بجٹ والی ویڈیو بنانے کے بارے میں سوچا تو انہیں بجلی کی بندش کے باعث مشکل کا سامنا تھا ۔

بینڈ ممبرز نے اس کا حل کچھ یوں تلاش کیا کہ بینڈ نے اپنے گانے يا-ويل-ويلي کی پوری ویڈیو بیٹری سے چلنے والے آلات کی مدد سے ایک چھوٹے سے کمرے میں شوٹ کی جو کہ ریلیز ہونے کے بعد چند ہی دنوں میں یوٹیوب پر6 ملین سے زائد ویوز حاصل کرنے میں کامیاب ہوگئی۔

اس ویڈیو میں دیکھا جاسکتا ہے کہ تمام بینڈ ممبرز نے سیاہ رنگ کی شرٹس پہنی ہوئی ہیں، ان کے آلات اور مائیکروفون ایل ای ڈی اسٹرپ لائٹس سے روشن ہیں۔

واضح رہے کہ شام میں 2011 کے بعد سے جاری تنازع نے ملک کے بنیادی انفراسٹرکچر کو تباہ کر دیا ہے اور آدھی آبادی کو بے گھر کر دیا ہے۔

ملک کی اہم آئل فیلڈز کو حکومت کے حریفوں نے نقصان پہنچایا اور تباہ کردیا اور شام کی قومی کرنسی کی قدر کو شدید نقصان پہنچنے کی وجہ سے اب دوسرے ممالک سے بجلی خریدنا بھی ملک کے لئے تقریباً نہ ممکن ہے ۔