صوبائی وزیر بلدیات سندھ سید ناصر حسین شاہ سے ایران کے قونصل جنرل  حسن نوریان  کی ملاقات ہوئی ہے۔

تفصیلات کے مطابق ملاقات میں باہمی دلچسپی کے امور ، دو طرفہ تجارت، سیاحت اور ثقافتی وفود کے تبادلے پر گفتگو ہوئی ہے۔

سید ناصر حسین شاہ کا کہنا ہے کہ ایران ہمارا بہترین ہمسایہ ملک ہے،    دونوں ممالک کے مضبوط تعلقات ہیں۔

سید ناصر حسین شاہ کا مزید کہنا تھا کہ ایران سے تعلقات کو قدر کی نگاہ سے دیکھتے ہیں ، سندھ میں سرمایہ کاری کے بہترین مواقع موجود  ہیں۔

ان کا کہنا تھا کہ سندھ حکومت تجارتی اور ثقافتی وفود کے تبادلوں کو فروغ دینے کے لیے ہر ممکن اقدامات کرے گی۔

دوسری جانب ایرانی قونصل جنرل کا کہنا تھا کہ دونوں ممالک  کے مابین مذہب، ثقافت سمیت بہت سی چیزیں یکساں ہیں ، دونوں ممالک ایک دوسرے کی صلاحیتوں سے فائدہ بھی اٹھا سکتے ہیں۔

واضح رہے کہ ایرانی قونصل خانے کے اکنامک اتاشی عامر جعفری بھی ان کے ہمراہ تھے اور  سید ناصر حسین شاہ نے معزز مہمانوں کو اجرک اور سندھی ٹوپی کے تحائف بھی پیش کیے تھے۔