وزیر مملکت فرخ حبیب نے اسلامی نظریاتی کونسل میں علماء کنونشن سے خطاب کرتے ہوئے کہا ہے  کہ پاکستان کا نہ صرف اس خطے میں بلکہ پوری دنیا میں اہم کردار ہے۔

ان کا کہنا تھا کہ بھارت مختلف ویب سائٹس کے ذریعے پاکستان کے خلاف پروپیگنڈا کر رہا ہے،  اس صورتحال میں علماء کرام کی ذمہ داریوں میں اضافہ ہو جاتا ہے کیونکہ  دینی اور معاشرتی سطح پر علماء کا عوام سے براہ راست رابطہ رہتا ہے۔

فرخ حبیب کا کہنا تھا کہ ملک کے خلاف ہونے والی سازشوں سے نمٹنے کیلئے علماء کرام عوام کو آگاہی دیں ، ہمیں اتحاد و اتفاق سے ملک کے خلاف سازشوں کو ناکام بنانا ہے۔

ان کا کہنا تھا کہ سی پیک  منصوبہ پاک چین دوستی کی بہترین مثال ہے جبکہ بھارت سی پیک منصوبے کی راہ میں روڑے اٹکانا چاہتا ہے۔

انہوں نے بتایا کہ پیغام پاکستان پر 1800سے زائد علماء اور مفتیان کے دستخط موجود ہیں ، ہمارا آئین تمام لوگوں کو آزادی رائے کا حق دیتا ہے، آئین کے تحت بنیادی حقوق کا نفاذ بہت اہم ذمہ داری ہے

وزیر مملکت نے خطاب کرتے ہوئے مزید کہا  کہ افغانستان کے مسئلے پر پاکستان نے بھرپور کردار ادا کیا ہے۔

 انہوں نے بتایا کہ ہم امن کو موقع دینا چاہتے ہیں ، پاکستان کسی بھی قسم کے انتشار کا حصہ نہیں بننا چاہتا ہے جبکہ وزیراعظم عمران خان کا اس حوالے سے دو ٹوک موقف ہے ، آپسی اختلافات کے ذریعے دشمن ہمارے خلاف سازش کرتا ہے۔

واضح رہے کہ انہوں نے یہ بھی بتایا کہ پاکستان میں کورونا وائرس کے باوجود گروتھ اور ایکسپورٹس میں اضافہ ہوا ہے۔