وزیر اطلاعات و نشریات و ہائر ایجوکیشن خیبرپختونخوا کامران بنگش نے کہا ہے کہ وزیراعلیٰ پنجاب عثمان بزدار نے گزشتہ حکومت کی شوبازی کو تین سال میں زمین بوس کر دیا ہے۔

کامران بنگش نے ریسکیو پاسنگ آوٹ تقریب سے خطاب کرتے ہوئے کہا کہ ہر دل عزیز وزیراعلیٰ پنجاب سردار عثمان بزدار کا خیبرپختونخواہ حکومت و شہریوں کی جانب سے شکریہ ادا کرتا ہوں۔

ان کا کہنا تھا کہ وزراعظم عمران خان کے نظریے کے مطابق دکھائی دے رہا ہے کہ تمام صوبے ملک کی اکائی ہیں ، گزشتہ حکومتوں نے صوبوں کو تقسیم کرنے کی کوشش کی آج انہیں ناکامی کا سامنا ہے۔

کامران بنگش کا مزید کہنا تھا کہ ہم پختون جس سے ہاتھ ملا لیں مرتے دم تک اس کا ہاتھ نہیں چھوڑتے ہیں ، ہم نے 10 اضلاع سے شروع کرکے 35 اضلاع تک ریسکیو کا جال بچھا دیا ہے۔

ان کا کہنا تھا کہ ہم نے مشکل حالات کے باوجود اپنے وسائل کو بروئے کار لاتے ہوئے کام جاری رکھا اور پانچ لاکھ افراد کو ریسکیو کی سہولت فراہم کی ہے۔

واضح رہے کہ انہوں نے یہ بھی بتایا کہ ہم تحصیلوں  سے قبائلی علاقوں تک ریسکیو سروسز کو پنچائیں گے۔