وزیر اعلی خیبر پختونخواہ محمود خان کہتے ہیں کہ ہمارے نوجوان بھر پور صلاحیتوں کے مالک ہیں۔

نوجوانوں کے عالمی دن کے موقع پر وزیر اعلی محمود خان نے پیغام دیتے ہوئے کہا کہ نوجوان قوم کا سرمایہ اور قوم کے روشن مستقبل کے ضامن ہیں ، ملکی تعمیر وترقی میں نوجوان طبقے کا کردار اور اہمیت مسلمہ ہے۔

ان کا کہنا تھا کہ نوجوانوں کی فلاح و بہبود ہماری حکومت کے منشور کا ایک اہم حصہ ہے، پاکستان تحریک انصاف میں نوجوان طبقے کو بنیادی حیثیت حاصل ہے۔

محمود خان نے کہا کہ آج کے دن کو منانے کا مقصد ملکی تعمیرو ترقی میں نوجوانوں کی اہمیت کا اعتراف کرنا ہے، موجودہ حکومت نوجوانوں کو مکمل طور پر بااختیار بنانے کیلئے عملی اقدامات بھی اُٹھارہی ہے۔

انہوں نے کہا کہ خیبر پختونخوا حکومت شروع دن سے نوجوانوں کی ترقی پر خصوصی توجہ دے رہی ہے،  صوبائی حکومت نے نوجوانوں کو بااختیار بنانے کیلئے خیبرپختونخوا کی پہلی یوتھ پالیسی تشکیل دی ہے۔

محمود خان کا مزید کہنا تھا کہ صوبے میں جوان مراکز کا قیام عمل میں لایا جا رہا ہے۔