سربراہ پاک فضائیہ ایئر چیف مارشل ظہیر احمد بابر سدھو نے کہا کہ ہم حقِ خود ارادیت کے حصول کیلئے کی جانے والی جدوجہد میں مقبوضہ جموں و کشمیر کی عوام کی سیاسی، اخلاقی اور سفارتی حمایت کی مستحکم پالیسی پر عمل پیرا رہیں گے۔

تفصیلات کے مطابق سربراہ پاک فضائیہ ایئر چیف مارشل ظہیر احمد بابر سدھو نے یومِ استحصالِ کشمیر کے حوالے سے پیغام دیتے ہوئے کہا کہ عالمی برادری کو مقبوضہ جموں و کشمیر کی عوام  کے بارے میں اپنی ذمہ داری کو فراموش نہیں کرنا چاہیے۔

سربراہ پاک فضائیہ ایئر چیف مارشل ظہیر احمد نے کہا کہ بھارتی مقبوضہ جموں و کشمیر کی حیثیت، آبادی میں غیر قانونی تبدیلی ، جاری فوجی محاصرے اور انسانی حقوق کی سنگین خلاف ورزی کے دو سال مکمل ہونے پر مقبوضہ جموں و کشمیر کی بہادر اورجفاکش عوام کی بھارتی غاصبانہ تسلط کے خلاف پر امن جدو جہد میں ان کے ساتھ کھڑے ہیں۔