گورنر پنجاب چوہدری محمد سرور کا کہنا ہے کہ کشمیریوں نے حق پر قائم رہ کر سنت امام حسین کو زندہ رکھا ہوا ہے۔

 تفصیلات کے مطابق چوہدری محمد سرور نے  یوم عاشورہ پر پیغام دیتے ہوئے کہا ہے کہ اعلی مقاصد ، استقامت اور حق کے لیے کسی قربانی سے دریغ نہیں کرنا چاہیے ، کشمیریوں نے کربلا کی طرح کشمیر کو بھی معرکہ حق و باطل کی ایک عظیم مثال بنا دیا ہے۔

چوہدری محمد سرور کا کہنا تھا کہ حضرت امام حسین نے شہادت پا کر تاریخ اسلام میں اس دن کو قیامت تک خاص بنا دیا ہے ،  صبر و استقامت کا مظاہرہ کرتے ہوئے خدائے بزرگ و برتر کے حضور سرخرو ہوا جا سکتا ہے۔

ان کا کہنا تھا کہ جذبہ شبیری مسلمانوں کے ایمان و یقین، سچائی اور اصول پرستی کی روایت کو جلا بخشتا ہے ،  یہ دن آج ہمیں شہدائے کربلا کی عظیم قربانیوں کی یاد دلاتا ہے۔