وزن کا بڑھنا بہت عام اور آسان بات ہے مگر اس بڑھے ہوئے وزن سے جان چھڑانا نہایت مشکل کام ہے، مگر اس مشکل کام کو شروع کرنے سے پہلے چند آسان طریقے اپنا کر خود کو وزن کم کرنے کے لمبے سفر کے لئے تیار کیا جا سکتا ہے۔

کلینیکل ڈائیٹیشن عائشہ ناصر کا کہنا ہے کہ جب کوئی انسان وزن کم کرنے کا سوچ کر ڈائیٹنگ یا ورزش شروع کرتا ہے تو اکثر اوقات شروع میں وزن میں کمی نہیں آتی اور انسان وزن کم نہ ہونے کی صورت میں اسے ناممکن سمجھ کر مایوس ہو بیٹھتا ہے۔

اگر اسی دوران ایک ایسی ڈائیٹ کر لی جائے جس سے 3 دنوں میں 5 کلو وزن کم ہو جائے تو وزن میں کمی کے خواہشمند افراد میں ایک خوشی کی لہر دوڑ جاتی ہے اور وہ خود کو اس سفر کے لئے مزید بہتر طریقے کے لئے تیار کر لیتے ہیں۔

تین دنوں مں پانچ کلو وزن کم کرنے کے لئے کی جانے والی ڈائیٹ کا نام ایگ ڈائیٹ ہے، اس ڈائیٹ پلان کے دوران ناشتے، دوپہر اور رات کے کھانوں کے دوران صرف انڈے ہی کھائے جا سکتے ہیں باقی سب غذائیں سختی سے منع ہیں جبکہ اس ڈائیٹ کو 3 الگ طرح سے بھی کیا جا سکتا ہے۔

انڈہ ڈائیٹ کی پہلی قسم کے دوران دن میں 6 سے 7 انڈے کھائے جا سکتے ہیں، اس کے علاوہ کوئی بھی غذا لینا منع ہے، صبح ناشتے میں 2 سے 3 انڈے ابال کر یا نان اسٹک پین میں ایک چمچ تیل میں فرائی کر کے کھائے جا سکتے ہیں ، دن میں سادہ پانی کے علاوہ صرف گرین ٹی کا استعمال کیا جا سکتا ہے۔

اس کی دوسری قسم  یہ ہے کے سارے دن میں 4 سے 6 انڈے لیں اور ساتھ میں دودھ کے دو گلاس ڈائیٹ میں شام کر لیں، اس ڈائیٹ کے دوران انڈوں کے ساتھ فائبر لینے کے لئے اسپغول کا چھلکا پانی میں گھول کر پیا جا سکتا ہے۔

ایگ ڈائیٹ کے دوران دودھ کا استعمال خاطر خواہ نتائج نہیں دیتا، دودھ سے بہتر ہوگا کہ دن کا ایک کھانا کسی اور غذا کے ساتھ تبدیل کر لیا جائے جیسے کہ دوپہر کے دوران ایک بڑا باؤل سلاد کا یا صبح کے دوران ایک مکمل ناشتہ، اس صورت کو ایگ ڈائیٹ کی تیسری قسم بھی کہا جاتا ہے۔

ماہرین کے مطابق ایگ ڈائیٹ 3 دن یا 6 دن سے زیادہ نہ دہرائیں ، یہ نقصان دہ بھی ثابت ہو سکتی ہے، ایگ ڈائیٹ چھورنے کے بعد وزن اچانک بڑھ سکتا ہے جسے روکنے کے لیئے ہفتے میں صرف دو بار روٹی کا استعمال کریں اور دو بار ہی چاول کھائیں، زیادہ تر دہی، انڈہ، سلاد، پروٹین اور فائبر  سے بھرپور غذائیں، دالیں اور مچھلی اور مرغی کا اسٹیک بنا کر کھا سکتے ہیں۔

ڈائیٹیشن عائشہ ناصر کے مطابق انڈے کی زردی میں گُڈ فیٹس موجود ہوتے ہیں مگر یہ ہائی اِن کولیسٹرول ہے، اسی لئے دل کے مریض اس ڈائیٹ کا استعمال ہر گز نہ کریں، دل سے متعلق جنہیں کوئی بھی شکایت ہو وہ اس ڈائیٹ سے گریز کریں، قبض، ہائی بلڈ پریشر اور شوگر کے مریضوں کو بھی ایگ ڈائیٹ کا استعمال بالکل منع ہے۔