کئی یورپی زبانیں جاننے والے اس روبوٹ کا نام پرسیفون ہے جس کا کام یونان کے ایک غار کی سیر کو آنے والے سیاحوں کی رہنمائی کرنا ہے۔

تفصیلات کے مطابق شمالی یونان میں تھیسالونیکی شہر سے 135 کلومیٹر دور ایلستراتی نامی ایک مشہور غار واقع ہے جو تقریباً ایک کلومیٹر طویل ہے۔

ایلستراتی غار میں اس سال جولائی سے سیاحوں کی تعداد میں خاصا اضافہ ہوا ہے کیونکہ یہاں تقریباً 500 فٹ تک ایک روبوٹ ان کی رہنمائی کرتا ہے اور انہیں اس غار کے بارے میں بھی بتاتا ہے۔

اس کے بعد اگلے 2400 فٹ فاصلے تک رہنمائی کی ذمہ داری دو انسان سنبھالتے ہیں۔

ایلستراتی غار اپنی خوبصورتی اور پراسراریت کے لئے پورے یورپ میں مشہور ہے جسے دیکھنے مختلف ممالک سے مختلف زبانیں بولنے والے سیاح یہاں ہر سال آتے ہیں۔

اسی لئے پرسیفون کو 33 زبانیں بولنے کے قابل بنایا گیا ہے جن میں سے بیشتر یورپ کی ہیں، علاوہ ازیں یہ 33 سوالوں کے جوابات یونانی زبان میں دے سکتا ہے۔

ایلستراتی غار کے سائنٹفک ڈائریکٹر، نائیکوس کارتالیس نے ایسوسی ایٹڈ پریس کو بتایا کہ اس روبوٹ کا خیال انہیں 17 سال پہلے ایک خبر دیکھ کر آیا تھا جس میں آرٹ گیلری آنے والے شائقین کی رہنمائی ایک روبوٹ کررہا تھا۔

کئی سال کوشش کے بعد بالآخر 2019 میں انہیں مطلوبہ رقم دی گئی اور اس طرح یونان کی نیشنل ٹیکنالوجی اینڈ ریسرچ فاؤنڈیشن کے ماہرین نے 118000 یورو (تقریباً 2 کروڑ 30 لاکھ روپے) کی فنڈنگ سے یہ روبوٹ تیار کرلیا۔

ابتدائی آزمائشوں میں کامیابی کے بعد اسے جولائی 2021 سے یہاں آنے والے سیاحوں کی رہنمائی پر مامور کردیا گیا ہے۔

پرسیفون اپنے پہیوں کے ذریعے آگے بڑھتا ہے اور مختلف زبانوں میں سیاحوں کو غار کے بارے میں بتاتا جاتا ہے۔

سنہرا سر چمک دار آنکھوں، سفید جسم اور ایک عدد ایل سی ڈی ڈسپلے والے پرسیفون روبوٹ پر سامنے کی طرف ایک کیو آر کوڈ بھی ہے جسے اسمارٹ فون سے اسکین کرکے ایلستراتی غار کی تمام تفصیلات تک رسائی حاصل کی جاسکتی ہے۔

غار کی انتظامیہ کا کہنا ہے کہ جب سے پرسیفون یہاں آیا ہے اور اس کی خبریں پھیلنا شروع ہوئی ہیں، تب سے یہاں سیاحوں کی تعداد بھی مسلسل بڑھ رہی ہے کیونکہ لوگ اس غار سے زیادہ روبوٹ کو دیکھنے کے خواہش مند ہیں۔

پرسیفون کا ایک مسئلہ اس کی سست رفتار ہے جس کی وجہ سے سیاحوں کو صرف 500 فٹ دور جانے میں بہت دیر لگ جاتی ہے، جلد ہی یہ مسئلہ حل کرکے اس کی رفتار میں اضافہ کیا جائے گا۔