برطانیہ کے ایک چڑیا گھر کے پانچ طوطوں کو مہمانوں کو برا بھلا کہنے پر عوامی نظروں سے اوجھل کرکے الگ کردیا۔

غیرملکی خبررساں ادارے کی رپورٹ کے مطابق برطانیہ کے ایک چڑیا گھر میں پانچ طوطے آنے والے مہمانوں کو برا بھلا کہتے تھے اور انہیں بد دعا دیا کرتے تھے۔

ان طوطوں کے نام بلی، ایرک، ٹائسن، جیڈ اور ایلسی ہیں، مرکز کے سربراہ اسٹیو نکولس نے بتایا کہ شاید طوطوں نے لوگوں سے ہی یہ سب سیکھ لیا تھا۔

رپورٹ کے مطابق تمام طوطے لنکن شائر وائلڈ لائف مرکز کی کالونی میں ایک چھوٹے سے چڑیا گھر میں تھے، یہ 200 کے قریب افریقی گرے طوطوں کے ساتھ وہاں موجود تھے لیکن رفتہ رفتہ ان کے مزاج میں تبدیلی آرہی تھی۔

اسٹیو نکولس نے بتایا کہ ہم طوطوں کی بدزبانی کے عادی تھے تاہم یہ عجیب بات ہے کہ پانچ طوطوں میں یہ عجیب عادت دیکھی گئی جو ان کے بگڑے اخلاق کو ظاہر کرتی ہے۔

انتظامیہ کے مطابق یہاں موجود درجنوں طوطے شرافت کی زندگی گزارتے ہوئے خاموش رہتے ہیں لیکن یہ پانچوں طوطے اب ہاتھوں سے نکلتے جارہے تھے۔

انہوں نے بتایا کہ چڑیا گھر میں بچوں کی موجودگی کو دیکھتے ہوئے یہ فیصلہ کیا گیا کہ ان طوطوں کو عوامی نظروں سے غائب کردیا جائے، اب ان طوطوں کو چڑیا گھر کے دور دراز حصوں میں الگ الگ کرکے رکھا گیا ہے۔

اسٹیو نکولس نے بتایا کہ چڑیا گھر آنے والے شائقین ان طوطوں کی بدکلامی کی شکایات کرنے کی بجائے ان سے محطوظ ہوتے تھے، ان کے پنجروں میں لوگوں کا رش دیکھ کر انتظامیہ کو معلوم ہوا ہے یہ لوگوں کو برا بھلا کہتے تھے۔