ترجمان دفتر خارجہ زاہد حفیظ چوہدری نے کہا کہ پاکستان افغانستان میں دن بدن تبدیل ہوتی صورتحال کو قریب سے دیکھ رہا ہے۔

تفصیلات کے مطابق ترجمان دفتر خارجہ زاہد حفیظ چوہدری نے کہا کہ پاکستان افغانستان میں سیاسی تصفیہ کے لیے کوششیں جاری رکھے گا ، امید رکھتے ہیں کہ تمام افغان فریقین اس اندرونی سیاسی مسئلے کے حل کے لیے مل کر کوششیں کریں گے۔

انہوں نے کہا کہ کابل میں پاکستانی سفارتخانہ پاکستانیوں ،  افغان باشندوں اور سفارت کاروں کی امداد کر رہا ہے ، کابل میں پاکستانی سفارتخانہ قونصلر خدمات فراہم کرنے والی عالمی برادری اور پی آئی اے کی پروازوں کی کوآرڈینیشن میں مدد کر رہا ہے۔

ترجمان دفتر خارجہ زاہد حفیظ چوہدری نے کہا کہ وزارت داخلہ میں خصوصی سیل قائم کر دیا گیا ہے ، وزارت داخلہ کا خصوصی سیل سفارتی اہلکاروں ، اقوام متحدہ اہلکاروں ، بین الاقوامی تنظیموں ، میڈیا و دیگر کے ویزا اور آمد کے حوالے سے سہولت کاری کرے گا۔