آنکھیں ہماری زندگی کو رنگ عطا کرتی ہیں، اگر ہماری آنکھیں تکلیف میں ہوں تو ہماری پوری زندگی ڈسٹرب ہوجاتی ہے، لہٰذا آنکھوں کا خیال رکھنا بے حد ضروری ہے۔

آج آپ کو ایسی غذائیں بتائی جارہی ہیں جو آپ کی آنکھوں کو صحت مند رکھنے کے لئے ضروری ہیں۔

گاجروں میں بیٹا کیروٹین نامی ایک کمپاؤنڈ بڑی مقدار میں پایا جاتا ہے، جو استعمال کے بعد وٹامن اے میں تبدیل ہو جاتا ہے، یہ وٹامن آنکھوں اور نظر کے لئے بہت مفید ہے۔

شکر قندی میں بھی گاجروں کی طرح بھرپور بیٹا کیروٹین ہوتا ہے یعنی یہ بھی وٹامن اے حاصل کرنے کا بہترین ذریعہ ہیں، شکر قندی کا مستقل استعمال بھی نظر کو بہتر بنانے اور آنکھوں کی صحت کے لئے مفید ہے۔

اس کے علاوہ کینو، موسمیاں، چکوترے اور ایسے ہی دیگر ترش پھل وٹامن سی سے مالا مال ہوتے ہیں، جو قوت مدافعت کو بڑھانے کے لئے اہم ترین چیز ہے، ان میں فلیونائیڈز بھی ہوتے ہیں جو آنکھوں کو موتیے جیسے خطرناک مرض سے بچاتے ہیں۔

سبز گوبھی، پالک اور سلاد کے پتوں سمیت تمام ہرے رنگ کی سبزیوں میں ایسے اجزاء پائے جاتے ہیں جو آنکھ کے مختلف امراض سے بچانے کے لئے بہت اہم ہیں۔

دودھ کی مصنوعات وٹامن اے اور دوسرے کمپاؤنڈز سے بھرپور ہوتی ہیں، جو مجموعی صحت کے لیئے اور بینائی کے لئے بھی بہترین ہوتی ہیں۔

 اس کے علاوہ دودھ اور دہی میں زنک بھی پایا جاتا ہے جو ایک اہم منرل ہے اور جسم کے ساتھ ساتھ آنکھ کے لئے بہت مفید ہے۔

زنک کی کمی سے رات کے وقت اندھے پن کا سامنا کرنا پڑ سکتا ہے، اس لئے دودھ اور اس کی مصنوعات کا استعمال اپنا روزمرہ معمول بنائیں۔

انڈے، خاص طور پر زردی بھی اور زنک سے بھرپور ہوتی ہے، جو آنکھ کو صحت مند رکھتے ہیں اور انہیں خراب ہونے سے بچانے میں مدد دیتے ہیں، اس لئے انڈوں کو اپنی روزمرہ خوراک کا حصہ بنائیں۔

مچھلی کا استعمال آنکھوں کے لئے کافی مفید سمجھا جاتا ہے، مچھلیوں میں اومیگا 3 فیٹی ایسڈز ہوتے ہیں، جو آنکھ کو خشک ہونے سے بچاتے ہیں اور آنکھ کے پردے کو خراب ہونے سے بچا کر نظر کو بہتر بناتے ہیں۔