سابق وزیر داخلہ رحمان ملک نے کہا کہ یوم عاشور حق و باطل کی لڑائی میں حق کی فتح کی یاد دلاتا ہے۔

تفصیلات کے مطابق سابق وزیر داخلہ رحمان ملک نے یوم عاشور پر پیغام دیتے ہوئے کہا کہ آج ہم نواسہ رسول ﷺ حضرت امام حسینؓ اور شہدائے کربلا کو خراج عقیدت و سلام پیش کرتے ہیں۔

انہوں نے کہا کہ کربلا میں امام حسینؓ نے جانوں کا نذرانہ پیش کیا مگر یزید کے سامنے جھکے نہیں ، اسوہ حسین ابن علیؓ پر عمل کرتے ہوئے یزیدیت کے خلاف آواز بلند کرتے رہینگے ، آج کا کربلا کشمیر ہے جہاں بھارتی فوج نہتے مسلمانوں پر ظلم و جبر کی انتہا کر رہی ہے۔

وزیر داخلہ رحمان ملک نے کہا کہ ہمیں حسین ابن علیؓ کی راہ پر چلتے ہوئے مظلوم کشمیریوں کا ساتھ دینا چاہیے ، اللہ تعالیٰ سے دعا ہے کہ آج کا دن اور آنے والا ہر دن پاکستان میں پرامن رہے۔