ترجمان دفتر خارجہ زاہد حفیظ چوہدری نے کہا کہ صادق خان دوحہ میں افغانستان پر علاقائی کانفرنس اور ٹرائیکا پلس اجلاس میں شرکت کریں گے۔

تفصیلات کے مطابق ترجمان دفتر خارجہ زاہد حفیظ چوہدری نے کہا کہ ایمبیسڈر صادق خان قطر کے خصوصی  نمائندہ برائے انسداد دہشت گردی و ثالثی ڈاکٹر مطلق القہطانی کی دعوت پر کر رہے ہیں۔

انہوں نے کہا کہ دو روزہ دورے میں پاکستان کے افغانستان میں سفیر منصور احمد خان بھی محمد صادق خان کے ہمراہ ہیں ، پاکستان  امریکہ ،  روس ،  چین پر  مشتعمل ٹرائیکا پلس طریقہ کار کو خصوصی اہمیت دیتا ہے ، دوحہ میں ٹرائیکا پلس اجلاس امریکہ کے افغانستان سے انخلاء کے بعد اہم موقع پر ہو رہا جب افغانستان کی صورتحال دن بدن خراب ہو رہی ہے۔

ترجمان دفتر خارجہ زاہد حفیظ چوہدری نے کہا کہ پاکستان امید کرتا ہے کہ دوحہ میں ہونے والی ملاقاتیں بین الافغان مذاکرات کی بحالی میں مددگار ثابت ہوں گی ، ان ملاقاتوں سے اپنے تمام ہمسائیوں سے پرامن تعلقات رکھنے والے پرامن اور مستحکم افغانستان کے سیاسی حل کی تلاش میں مدد ملے گی۔