توشہ خانہ میں تحائف کی خریداری کا معاملہ وفاقی کابینہ میں بھی پہنچ گیا، وفاقی وزراء نے وزیراعظم سے بیرون ممالک سے ملنے والے  تحائف سے متعلق پوچھ لیا۔

ذرائع  کے مطابق کابینہ اجلاس کے دوران وفاقی وزیر شفقت محمود بول پڑے، اجلاس کے دوران وفاقی وزیر شفقت محمود نے کہا کہ وزیراعظم صاحب میڈیا پر توشہ خانے سے متعلق آپ کے بارے میں باتیں ہورہی ہیں، ہمیں حقیقت سے آگاہ کیا جائے۔

شیریں مزاری نے بھی کہا کہ دنیا کے دیگر ممالک کے سربراہان بھی ملنے والے تحائف کی تفصیلات بتاتے ہیں، ہمیں بھی یہ تفصیلات بتانی چاہیے۔

اجلاس کے دوران مراد سعید نے  تحائف کی تفصیلات بتانے کی تجویز سے اختلاف کرتے ہوئے کہا کہ اس سے دوست ممالک ناراض ہوں گے۔

توشہ خانے میں تحائف کے حوالے سے  پوچھے گئے  وفاقی وزراء کے سوالات پر وزیر اعظم عمران خان کا کہنا تھا  کہ تحائف  کے بارے میں میرا مؤقف سامنے آچکا ہے، ہماری حکومت میں تحائف کی رقم کو مختص کردیا گیا ہے۔

وزیر اعظم عمران خان  کا مزید کہنا تھا کہ پہلے صرف 25 فیصد تحفوں کے پیسے دیئے جاتے تھے  لیکن اب ہم نے یہ رقم بڑھا کر 50 فیصد کر دی ہے، اب  میں اور میرے  وزراء سمیت جو بھی سرکاری تحفہ توشہ خانے سے لینا چاہے  اسے 50 فیصد رقم جمع کروانی  ہو گی۔

واضح رہے اس سے قبل وزیرِ اعظم عمران خان سے وزیرِ اعظم آزاد جموں و کشمیر سردار عبدالقیوم نیازی کی ملاقات ہوئی  تھی جس میں آزاد کشمیر ترقیاتی پیکیج اور پانچ سالہ ترقیاتی پلان پر گفتگو کی گئی تھی۔

ملاقات وزیرِ اعظم عمران خان نے کہا تھا کہ حکومت آزاد کشمیر میں سیاحت کے فروغ کیلئے انفراسٹرکچر کی بہتری کے اقدامات اٹھا رہی ہے، وادی میں سیاحت کے فروغ سے معاشی ترقی اور روزگار کے مواقع پیدا ہونگے۔

 وزیرِ اعظم عمران خان نے مزید کہا تھا کہ آزاد کشمیر کے لوگوں کو صحت اور تعلیم کی سہولیات کی فراہمی یقینی بنانے کیلئے اقدامات اٹھائے جا رہے ہیں، ترقیاتی پیکیج میں سیاحتی انفراسٹرکچر، بنیادی صحت و تعلیم اور ایل او سی کے قریب مقیم آبادی کیلئے منصوبے شامل ہیں۔