شمال مشرقی بحیرہ عرب میں ٹراپیکل سمندری طوفان کے باعث محکمہ موسمیات نے تیسرا الرٹ جاری کردیا۔

تفصیلا ت کے مطابق شمال مشرقی بحیرہ عرب میں ممکنہ سمندری طوفان شاہین کے پیش نظر شہر قائد میں تیز ہوائوں کے ساتھ وقفے وقفے سے بارش کا سلسلہ جاری ہے، ممکنہ طوفانی بارشوں کے پیش نظر محکمہ موسمیات  کی جانب سے ضلعی انظامیہ سمیت مختلف اداروں کو ہائی الرٹ رہنے کی ہدایت جاری کردی گئی ہے۔

محکمہ موسمیات کے مطابق شہر قائد میں آج رات سے موسلادھار اور طوفانی بارش کا امکان ہے ، ناگن چورنگی پر انتظامیہ کی جانب سے کشتیوں اور دیگر مشینری کے ساتھ عملے کو طعینات کردیا گیا ہے۔

محکمہ موسمیات کا کہنا ہے کہ   حیدرآباد، ٹھٹھہ، بدین میں 2 اکتوبر تک وسیع پیمانے پر بارشوں کا امکان ہے جبکہ میرپور خاص، تھر پارکر، عمرکورٹ، سانگھڑ سمیت دیگر اضلاع میں بھی بارش کا امکان ہے۔

محکمہ موسمیات  کا یہ بھی کہنا ہے کہ تیز بارشیں کراچی میں اربن فلڈنگ کا باعث بن سکتی ہیں، بدین، ٹھٹھہ، حیدرآباد، دادو میں بھی اربن فلڈنگ کا خطرہ ہے۔ آندھی کے باعث کمزور عمارتوں کو نقصان کا خطرہ رہے گا۔

محکمہ موسمیات کا  مزید کہنا ہے کہ پچھلے 12 گھنٹے کے دوران ڈپریشن کی رفتار 20 کلومیٹر فی گھنٹہ ہے، سسٹم شدت اختیار کرکے 12 سے 18 گھنٹوں میں سائیکلونک اسٹارم بن سکتا ہے۔

علاوہ ازیں بلوچستان کے مختلف اضلاع میں بھی 3 اکتوبر تک بارشیں متوقع ہیں جبکہ لسبیلہ، سومیانی، اورماڑا، پسنی، گوادر، تربیت اور جیوانی میں بھی اربن فلڈنگ کا خطرہ بتایا گیا ہے۔

واضح رہے کہ گزشتہ روز ڈائریکٹر محکمہ موسمیات سردار سرفراز کا کہنا تھا کہ   ہوا کا کم دباؤ ڈپریشن بن چکا ہے، آج رات تک ڈیپ ڈپریشن بن جائے گا ، کل صبح سمندری طوفان بننے کے قوی امکانات ہیں، شہر میں آج دوپہر سے تیز بارش کے امکانات ہیں۔

محکمہ موسمیات کے مطابق شہر میں 30 کلو میٹر فی گھنٹہ کی رفتار سے ہوا چل رہی ہے،بارش کے دوران آندھی چلنے کے بھی امکانات ہیں ، اس دوران ہوا کی رفتار 75 تا 80 کلو میٹر فی گھنٹہ ہوسکتی ہے۔

محکمہ موسمیات کا کہنا تھا کہ  سمندرمیں طغیانی رہے گی اور معمول سے اونچی لہریں بلند ہونے کے امکانات ہیں ، 2007 میں سمندری طوفان بنا تھا ، صورتحال ویسی ہی معلوم ہورہی ہے