وزیر توانائی سندھ امتیاز شیخ نے کہا ہے کہ تھر کول ملکی توانائی کی ضروریات کو پورا کرنے کی عملی تصویر ہے۔

تفصیلات کے مطابق وزیر توانائی سندھ امتیاز شیخ سے سینیٹر کرشنا کماری اور وزیراعلیٰ کے معاون خصوصی ویرجی کولہی کی ملاقات ہوئی جس میں تھر کول پاور پراجیکٹ کے حوالے سے بات چیت کی گئی۔

اس موقع پر تھر کول پاور پراجیکٹ کے باعث متاثر ہونے والے تھر کے ایک گاؤں باؤ جو تھڑ کے 185 مکینوں کو دوسرے مقام پر منتقل کرنے کے لئے اتفاق کیا گیا کہ سندھ حکومت متاثرہ گاؤں کے تمام 185 گھروں کو دوسری جگہ منتقل کرنے کے لئے زمین مہیا کرے گی۔

ملاقات میں وزیر توانائی سندھ امتیاز شیخ نے کہا کہ کول پاور پراجیکٹ پر کام کرنے والی کمپنی فی گھرانہ 5 لاکھ روپے امدادی رقم ادا کرے گی تاکہ منتقل ہونے والے گاؤں کے تمام گھرانوں کو سہولت مہیا کی جاسکے۔

امتیاز شیخ نے کہا کہ تھر کول ملکی توانائی کی ضروریات کو پورا کرنے کی عملی تصویر ہے جبکہ تھر کول پاور پرجیکٹ شہید محترمہ بینظیر بھٹو کے خوابوں کی بھی تعبیر ہے۔

وزیر توانائی سندھ امتیاز شیخ نے مزید کہا کہ پاور پروجیکٹ پر کام کرنے والی کمپنی فی گھرانہ 5لاکھ روپے امدادی رقم ادا کرے گی تاکہ منتقل ہونے والے گاٶں کے تمام گھرانوں کو سہولیات مہیا کی جاسکے۔

واضح رہے گزشتہ روز وزیر توانائی سندھ امتیاز شیخ نے کراچی سے جاری بیان میں امتیاز شیخ نے کہا تھا کہ حکومت نے عوام پر ایک بار پھر پیٹرول بم گرادیا ہے، پیٹرولیم مصنوعات کی قیمتیں ملکی تاریخ کی بلندترین سطح پر پہنچ چکیں۔

امتیاز شیخ کا کہنا تھا کہ وفاقی حکومت نے پیٹرول پر 5 روپے بڑھاکر ثابت کردیا کہ حکومت عوام دشمن ہے۔

وزیر توانائی سندھ امتیاز شیخ کا مزید کہنا تھا کہ مہنگائی اور بےروزگاری نے عوام کو پہلے ہی بدحال کیا ہوا ہے، پیٹرول مصنوعات کی قیمتیں بڑھا کر مہنگائی مزید بڑھا دی جاتی ہے۔