عالمی شہرت یافتہ آسٹریلین کمنٹیٹر مائیک ہیزمین نے کہا ہے کہ میں نے پاکستان میں کام کر کے ہمیشہ خوشی محسوس کی ہے۔

تفصیلات کے مطابق ایک انٹرویو میں آسٹریلین کمنٹیٹر مائیک ہیزمین نے کہا کہ پاکستان میں  لوگ بہت پیار کرنے والے ہیں، نیوزی لینڈ کا دورہ پاکستان منسوخ ہونا بہت افسوس ناک ہے۔

ان کا کہنا تھا کہ میں پاکستان میں کرکٹ کے قدرتی ٹیلنٹ سے کافی متاثر ہوں، پاکستان کے کرکٹرز دنیا کے دیگر کھلاڑیوں کی نسبت مختلف صلاحیتیں رکھتے ہیں۔

مائیک ہیزمین نے کہا کہ پاکستانی کرکٹرز کا بیٹنگ اور بولنگ اسٹائل مختلف ہے جو دنیا میں کہیں نظر نہیں آتا، میں جب پاکستان آتا ہوں تو دو، تین نئے باصلاحیت کھلاڑی ملتے ہیں جو کہ خوش آئند بات ہے۔

انہوں نے کہا کہ نیوزی لینڈ کے دورہ پاکستان کی منسوخی پر روز بروز کچھ نئی خبریں سننے کو مل رہی ہیں جس سے دکھ ہو رہا ہے، انگلش کھلاڑیوں سے پوچھے بغیر انگلینڈ نے پاکستان کا دورہ منسوخ کر دیا جو غلط بات ہے جبکہ پاکستان نے مشکل وقت میں انگلینڈ کا دورہ کیا۔

آسٹریلین کمنٹیٹر نے کہا کہ انگلینڈ میں جب کورونا کی وباء عروج پر تھی پاکستانی کھلاڑیوں نے اپنی جان خطرے میں ڈال کر وہاں کا دورہ کیا، انگلینڈ نے پاکستان کا دورہ منسوخ کر کے ایک شرم ناک فیصلہ کیا ہے۔

مائیک ہیزمین  کا مزید کہنا تھا کہ نیوزی لینڈ نے دورہ منسوخ تو کیا لیکن پاکستان کے ساتھ سیکیورٹی تھریٹ کی انفارمیشن شیئر نہیں کی۔