وزیراعلیٰ پنجاب عثمان بزدارکا کہنا ہےکہ تعلیم کی بدولت ہی قومیں عروج حاصل کرتی ہیں، ماضی کی حکومت نے 5 سال میں  1330 جبکہ پاکستان تحریک انصاف کی حکومت نے تین سالوں میں 1533 اسکول اپ گریڈ کیے ہیں۔

تفصیلات کے مطابق وزیراعلیٰ پنجاب عثمان بزدار نے عالمی یوم خواندگی کے موقع پرجاری کردہ اپنے پیغام میں کہا کہ خواندگی انسان کے شعور و آگاہی کو جلا بخشتی ہے، تعلیم کی بدولت ہی قومیں عروج حاصل کرتی ہیں، حصول تعلیم ہر بچے کا بنیادی حق ہے، حکومت پنجاب اس حق کو بچوں تک پہنچانے کیلئے سرگرم عمل ہے، صوبے کی تاریخ میں جامع  پنجاب اسکول ایجوکیشن پالیسی  2020 متعارف کرائی گئی ہے۔

انہوں نے کہاکہ شرح خواندگی بڑھانے کیلئے پہلی مرتبہ ٹرانس جینڈر کی تعلیم پر توجہ دی گئی ہے، ہماری حکومت نے ملتان میں پہلا ٹرانس جینڈر اسکول قائم کیا ہے، اسکولوں میں ٹیچرز کی کمی کو پورا کرنے کیلئے 31 ہزار سے زائد ایس ٹی آئی بھرتی کئے جا رہے ہیں، 33 ہزار سے زائد مرد و خواتین ایجوکیٹرز کی بھرتی کا عمل جلد شروع کیا جا رہا ہے، 10 پسماندہ اضلاع کے اسکولوں میں اساتذہ کی کمی دور کرنے کیلئے بھرتی کیلئے قواعد میں نرمی کی گئی ہے، ان اضلاع میں ہارڈ شپ کے تحت مقامی نوجوانوں کو بھرتی کیا جا رہا ہے۔

وزیراعلیٰ پنجاب نے مزید کہا کہ رواں مالی سال میں مزید 7 ہزار اسکول اپ گریڈ کئے جائیں گے، مجموعی طور پر 27 ہزار سکول اپ گریڈ کئے جائیں گے۔

عالمی یوم خواندگی

دنیا بھر میں 8 ستمبر کو عالمی یوم خواندگی منایا جاتا ہے۔

اس دن کے منانے کا مقصد دنیا سے جہالت کے اندھیرے دور کرکے آنے والی نسلوں کو ایک بہتر اور روشن مستقبل کی ضمانت دینا ہے۔

بہت سے ممالک میں ہر سال خواندگی کے فروغ کے عالمی دن کی مناسبت سے مختلف پروگراموں اور سرگرمیوں کا انعقاد کیا جاتا ہے۔ لیکن اس کے باوجود دنیا بھر میں لاکھوں بچے ایسے ہیں جو اسکول نہیں جاتے اور تعلیم جیسے بنیادی حق سے محروم ہیں۔

ہمارے ملک کے مختلف علاقوں میں بھی کم شرح خواندگی کی ایک بڑی وجہ تعلیم اور اس کی اہمیت کے بارے میں آگاہی نہ ہونا اور ناقص تعلیمی نظام بھی ہے۔