نیوزی لینڈ کرکٹ ٹیم اسلام آباد انٹڑنیشنل ایئرپورٹ سے دبئی کے لئے روانہ ہو گئی ہے۔

تفصیلات کے مطابق ٹیم اور عملے سمیت 34 افراد خصوصی پرواز کے ذریعے دبئی روانہ ہوئے، نیوزی لینڈ ٹیم کا طیارہ تاخیر سے اسلام آباد پہنچا جس سے پرواز کی روانگی میں تاخیر ہوئی۔

نیوزی لینڈ کی ٹیم نے پاکستان کرکٹ ٹیم کے ساتھ تین ون ڈیز، اور پانچ ٹی 20 میچز کی سیریز کھیلنی تھی، جس کو نیوزی لینڈ کی حکومت نے سیکورٹی خدشات کا بہانہ بنا کر منسوخ کیا اور ٹیم کو فوری وطن واپسی کا حکم دیا تھا۔

 نیوزی لینڈ کی ٹیم 11 ستمبر کو اسلام آباد پہنچی تھی، پہلی ون ڈے سیریز راولپنڈی کرکٹ اسٹیڈیم میں 21 ستمبر تک کھیلی جانی تھی، پہلے ون ڈے سے کچھ دیر قبل کرکٹ سیریز کو منسوخ کیا گیا تھا، جس پر پاکستان سمیت دنیابھر کے کرکٹ شائقین کو حیرت میں ڈال دیا۔

 واپسی سے قبل نیوزی لینڈ کی ٹیم کو اسلام آباد کے مقامی ہوٹل سے انتہائی سخت سیکورٹی میں اسلام آباد ائیرپورٹ پہنچایا گیا جہاں محکمہ صحت حکام نے دبئی جانے والے مسافروں کے ایس او پیز پر عملدرآمد کرتے ہوئے تمام کھلاڑیوں اور دیگر آفیشلز کے ریپیڈ ٹیسٹ مکمل کیے۔

نیوزی لینڈ کی ٹیم کی وطن واپسی کے لیے کیلئے نجی کمپنی کے ایئربس جہاز 319 کی خدمات حاصل کی گئی ،پچاس نشستوں پر مشتمل جہاز غیر ملکی کمپنی روٹانا جیٹ کی ملکیت ہے۔

 اس سے قبل نیوزی لینڈ کی حکومت نے پاکستان سول ایوی ایشن اتھارٹی سے خصوصی چارٹر طیارے کے لینڈنگ رائٹس طلب کیے تھے، پاکستان سول ایوی ایشن اتھارٹی نے کھلاڑیوں کی بحفاظت واپسی کے لیے خصوصی طیارے کو پاکستان میں داخل ہونے کی خصوصی اجازت دی تھی۔