پاک فضائیہ نے انٹر سروسز گالف چیمپئین شپ 2021  جیت لی ہے۔

تفصیلات کے مطابق انٹر سروسز گالف چیمپئین شپ 2021 پاکستان ائیر فورس سکائی ویو گالف اینڈ کنٹری کلب لاہور میں منعقد ہوئی تھی، ائیر وائس مارشل ظفر اسلم، ائیر آفیسر کمانڈنگ سنٹرل ائیر کمانڈ، چیمپیئن شپ کی تقریب تقسیم انعامات کے مہمانِ خصوصی تھے۔

اس موقع پر خطاب کرتے ہوئے انہوں نے  کوویڈ وباء کے حالات کے باوجود اس ایونٹ کو کامیاب بنانے پر تمام شرکاء کا شکریہ اد ا کیا ہے۔

 انہوں نے مزید کہا کہ یہ ٹورنامنٹ اس بات کی غمازی کرتا ہے کہ گالف ایک ایسا کھیل ہے جو کہ تینوں مسلح افواج کے کھلاڑیوں کو قریب لا کر صحتمند کھیل کی سرگرمیوں کو فروغ دینے کا باعث ہے۔

ترجمان پاک فضائیہ کا کہنا ہے کہ گیسٹ کیٹگری میں ریئر ایڈمرل طارق علی، بریگیڈیئر طاہر اور ریئر ایڈمرل عبدالباسط بٹ نے بالترتیب پہلا، دوسرا اور تیسرا نیٹ انعام حاصل کیا جبکہ پہلے، دوسرے اور تیسرے گراس انعام کے حقدار ائیر کموڈور طارق عثمان عباس، کموڈور ساجد حسین اور ائیر کموڈور عمران مدد ترمذی قرار پائے، سب سے طویل شاٹ کا انعام کموڈور  وجیہ الحسن  نے حاصل کیا  جبکہ پن کے نزدیک ترین شاٹ  کا انعام ایئر وائس مارشل ظفر اسلم  نے حاصل کیا ہے۔

ترجمان پاک فضائیہ نے مزید بتایا کہ اس موقع پر رئیر ایڈمرل عبدالباسط بٹ، پریذیڈنٹ سروسز اسپورٹس کنٹرول بورڈ جوائنٹ اسٹاف ہیڈکوارٹرز نے ائیر وائس مارشل ظفر اسلم کو یادگاری شیلڈ بھی پیش کی ہے۔

واضح رہے کہ مہمانِ خصوصی نے جیتنے والوں کھلاڑیوں کو ٹرافی اور انعامات تقسیم کیے، انٹر سروسز گالف چیمپیئن شپ کی پروفیشنل ٹرافی پاک فضائیہ نے جیتی جو کہ ائیر وائس مارشل اکرام نور نے حاصل کی جبکہ پاک آرمی نے گالف کی ایمیچئیر ٹرافی حاصل کی ہے۔

خیال رہے کہ انٹر سروسز گالف چیمپئین شپ 2021 پاک آرمی، نیوی اور فضائیہ کی ٹیموں کے مابین 15 سے 19 ستمبر 2021 تک کھیلی گئی جس کا مقصد تینوں مسلح افواج کے  گالفرز کو ایک ساتھ کھیلنے کا موقع فراہم کرنے کے ساتھ ساتھ صحت مند کھیلوں کی سرگرمیوں کو فروغ دینا تھا۔