اپوزیشن لیڈر سندھ اسمبلی حلیم عادل شیخ نے کہا ہے کہ الیکٹرانک ووٹنگ مشین پر الیکشن کمیشن کے اعتراضات مزاحیہ کن ہیں۔

تفصیلات کے مطابق اپوزیشن لیڈر سندھ اسمبلی حلیم عادل شیخ نے اپنے ایک بیان میں کہا کہ الیکشن کمیشن ای وی ایم ماہرین کے بجائے کرپشن ماہرین سے مشورے کررہی ہے، چیف الیکشن کمیشن نے اپوزیشن جماعتوں کیساتھ گٹھ جوڑ کرلیا ہے۔

اپوزیشن لیڈر سندھ اسمبلی کا کہنا تھا کہ الیکٹرانک ووٹنگ مشین پر الیکشن کمیشن کے اعتراضات مزاحیہ کن ہیں، اپوزیشن نے اقتدار کیلئے دھاندلی اور چور دروازے استعمال کیے یہ انتخابی اصلاحات نہیں چاہتے۔

حلیم عادل شیخ کا اپنے بیان میں یہ بھی کہنا تھا کہ دنیا کے کئی ممالک ٹیکنالوجی میں پاکستان سے بہت آگے نکل چکے ہیں۔

اپوزیشن لیڈر سندھ اسمبلی نے کہا کہ پاکستان میں الیکشن کیلئے پیپر بلیٹنگ کا عمل قابل اعتماد نہیں رہا، انتخابی عمل کو جدید طرز پر لانے کی ضرورت ہے۔

حلیم عادل شیخ نے یہ بھی کہا کہ اپوزیشن اور الیکشن کمیشنر انتخابی اصلاحات میں روڑے اٹکا رہے ہیں، ای وی ایم سے اپوزیشن اور الیکشن کمشنر کی دکانوں پر تالے لگ جائیں گے۔

اپوزیشن لیڈر سندھ اسمبلی کا کہنا تھا کہ الیکشن کمیشن چاہے توای وی ایم کا ماہرین کے ذریعے معائنہ کرسکتی ہے لیکن الیکشن کمیشن کرپشن کے ماہرین سے مشاورت کررہی ہے۔

حلیم عادل شیخ کا یہ بھی کہنا تھا کہ نااہل، نالائق اپوزیشن انتخابات کا سسٹم درست نہیں کرنا چاہتی، حکومت ای وی ایم کو اتفاقِ رائے سے پارلیمنٹ میں  منظور کرائے گی۔

اپوزیشن لیڈر سندھ اسمبلی حلیم عادل شیخ کا مزید کہنا تھا کہ الیکشن ریفارمز کیلئے عمران خان کی جدوجہد تاریخ میں لکھی جائے گی۔

دوسعری جانب اپوزیشن لیڈر سندھ اسمبلی حلیم عادل شیخ نے ڈسٹرکٹ ایسٹ حلقہ پی ایس 99  کے علاقے میں  گندگی، کچرے اور گٹرنالوں کی صورتحال پر تشویش کا اظہار  کرتے ہوئے کہا کہ سندھ حکومت نے کراچی کو کچرہ کنڈی بنادیا ہے۔

حلیم عادل شیخ نے کہا کہ مراد علی شاہ وزیراعلیٰ سندھ اور مرتضیٰ وہاب کے ایم سی کے ایڈمنسٹریٹر ہیں،  سندھ حکومت نے ایک ارب روپیہ سالڈ ویسٹ کے ذریعے کچرا اٹھانے کے لیے رکھا ہے۔

ان کا کہنا تھا کہ  قبرستان اور بازار کی مین سڑک کچرے سے بھری ہوئی ہے، 13 سال میں 8900 ارب سندھ کو ملے ہیں۔

  حلیم عادل شیخ کا کہنا تھا کہ صورتحال یہ ہے گٹر نالے ابل رہے ہیں کچرہ کنڈی جگہ جگہ موجود ہے، کراچی کو کچرہ کنڈی بنانے کی ذمے دار پی پی پی ہے۔