مشیر برائے قومی سلامتی ڈاکٹر معید یوسف نے کہا ہے کہ پاکستان نے ہمیشہ افغانستان جنگ کے خاتمے کے لئے مذاکرات اور سیاسی تصفیے کی حمایت کی۔

تفصیلات کے مطابق وزیر اعظم کے مشیر برائے قومی سلامتی امور ڈاکٹر معید یوسف نے اپنے ایک بیان میں کہا  کہ پاکستان افغانستان میں جنگ کی وجہ سے بری طرح متاثر ہوا، ہمارے 80 ہزار سے زائد شہریوں کا جانی اور 150 ارب ڈالر سے زائد کا معاشی نقصان اٹھانا پڑا۔

وزیر اعظم کے مشیر برائے قومی سلامتی امور نے کہا کہ افغانستان میں انسانی بحران نہ پیدا ہو، یہ عالمی برادری کی اجتماعی ذمہ داری ہے۔

 ڈاکٹر معید یوسف کا کہنا تھا کہ بھارت نے افغان سرزمین کو پاکستان کے خلاف دہشت گردی کے لیے استعمال کیا جبکہ پاکستان نے ہمیشہ افغانستان جنگ کے خاتمے کے لئے مذاکرات اور سیاسی تصفیے کی حمایت کی۔

وزیر اعظم کے مشیر برائے قومی سلامتی امور ڈاکٹر معید یوسف کا مزید کہنا تھا کہ طالبان نے بین الاقوامی برادری کے ساتھ کام کرنے کا اشارہ دیا ہے، عالمی برادری کو اپنی کوششوں کو مربوط کرنا چاہیے، برادری کو بڑی طاقتوں اور افغانستان کے قریبی پڑوسیوں کے ساتھ اتفاق رائے کے ساتھ آگے بڑھانا چاہیے۔

واضح رہے اس سے قبل  وزیر اعظم کے قومی سلامتی مشیر ڈاکٹر معید یوسف نے میڈیا سے گفتگو کرتے ہوئے کہا تھا کہ دنیا اس طرح جواب نہیں دے رہی جس طرح دینا چاہیے۔

ڈاکٹر معید یوسف کا مزید کہنا تھا کہ بھارت نے فیک نیوز کے ذریعے پاکستان کے خلاف پروپیگنڈا کیا، دنیا آج بھارت کے بیانیے کو سچ سمجھنے کو تیار نہیں ہے،پاکستان بھارت کی حقیقت بیان کرنے کا کام جاری رکھے گا۔