گور نر پنجاب چوہدری محمد سرور نے کہا ہے کہ جب تک مسئلہ کشمیر حل نہیں ہوگا خطے میں امن نہیں ہوسکتا۔

تفصیلات کے مطابق گورنر پنجاب چوہدری محمد سرور سے صدر آزاد کشمیر بیرسٹر سلطان محمود کی گورنر ہاؤس لاہور میں ملاقات ہوئی ہے۔

ملاقات کے دوران دونوں رہنماؤں نے خطے میں امن کے لیے مسئلہ کشمیر کے حل کو لازمی قرار دیا ہے۔

اس موقع پر گور نر پنجاب چوہدری محمد سرور نے کہا کہ بھارت سفارتی سطح پر دنیا میں تنہا اور بے نقاب ہو چکا ہے۔

گور نر پنجاب چوہدری محمد سرور نے  مزیدکہا کہ ہم کشمیریوں کے ساتھ کھڑے ہیں اور وزیراعظم عمران خان حقیقی معنوں میں کشمیریوں کے سفیر بن کر ان کا مقدمہ لڑرہے ہیں۔

چوہدری محمد سرور نے کہا کہ نریندر مودی اور بھارتی افواج کشمیر میں دنیا کی سب سے بڑی دہشت گردی کررہا ہے، جب تک مسئلہ کشمیر حل نہیں ہوگا خطے میں امن کے قیام کا خواب پورا نہیں ہوسکتا۔

گورنر پنجاب چوہدری محمد سرور نے مزید کہا ہے کہ کشمیری عوام جرات کے ساتھ اپنی آزاد ی کی جدوجہد کررہی ہے انشااللہ وہ کامیاب ہوگی۔

ملاقات میں آزاد کشمیر کے صدر بیرسٹر سلطان محمود نے گور نر پنجاب  سے گفتگو کرتے ہوئے کہا کہ پاکستان کے موجودہ کوششوں کی وجہ سے کشمیریوں کی آواز آج دنیا کے کونے کونے میں پہنچ رہی ہے، وزیراعظم عمران خان کی قیادت میں ہم آزاد کشمیر کو مضبوط اور خوشحال بنائیں گے۔

بیر سٹر سلطان محمود نے کہا کہ بندوق اور گولی کی طاقت سے بھارت کشمیریوں کی آواز کو کسی صورت دبا نہیں سکتا، بھارت کشمیر میں انسانی حقوق کا قاتل عام کررہا ہے ۔

آزاد کشمیر کے صدر بیرسٹر سلطان محمود نے مزید کہا کہ طاقت سے بھارت کشمیریوں کی آواز کو دبا نہیں سکتا،دنیا کو بھارتی مظالم کا فوری اور سخت نوٹس لینا چاہیے۔