پاکستان کرکٹ بورڈ(پی سی بی) کے چیف ایگزیکٹو وسیم  خان نے کہا ہے کہ گزشتہ 48 گھنٹے ہمارے لئے بہت مشکل تھے، ہم کچھ حقائق منظر عام پر لانا چاہتے ہیں۔

تفصیلات کے مطابق پاکستان کرکٹ بورڈ (پی سی بی) کے چیف ایگزیکٹو وسیم خان نے اپنے ایک بیان میں کہا کہ جمعہ کی صبح مجھے ای ایس آئی سیکورٹی کے سربراہ رگ ڈکیسن نے فون کال کی رگ ڈکیسن نے بتایا کہ فائیو آئیز نے نیوزی لینڈ کے ڈپٹی وزیراعظم کو بتایا ہے کہ نیوزی لینڈ کرکٹ ٹیم پر حملے کا خدشہ ہے۔

ان کاکہنا تھا کہ ہمارے  پوچھنے کے باوجود ہمارے یا ہماری سیکورٹی ایجنسیز کو اس سیکورٹی تھریڈ کے بارے میں نہیں بتایا گیا ،ہم نے اپنی سیکیورٹی ایجنسیز سے رابطہ کیا تو انہوں نے واضح کیا کہ مہمان ٹیم کو کوئی سیکورٹی تھریڈ نہیں  ہے۔

وسیم خان کا کہنا تھا کہ جب آپ کسی دورے پر ہوں تو وہاں کی سیکورٹی ایجنسیز پر اعتماد کیا جاتا ہے، دورے کو ختم کرنے کا یکطرفہ فیصلہ کرکے بہت غلط مثال قائم کی گئی ہے ۔

چیف ایگزیکٹو پی سی بی کا کہنا تھا کہ اس فیصلے سے دونوں بورڈز کے تعلقات متاثر ہونے کے ساتھ ساتھ اس سے دور رس نتائج مرتب ہوں گے ۔

ان کا کہنا تھا کہ پاکستان میں موجود مہمان ٹیم کے کھلاڑیوں اور سیکیورٹی نمائندگان نے سیکورٹی پر اعتماد کا اظہار کیا  تھا۔

وسیم خان کا کہنا تھا کہ ہمارے لڑکوں نے نیوزی لینڈ میں 14 دن مشکل ترین قرنطینہ کیا، مسجد حملے کے باوجود وہاں گئے مگر سب کے سامنے واضح ہے کہ برابری کی بنیاد پر فیصلے نہیں ہورہے۔

پاکستان کرکت بورڈ کے چیف ایگزیکٹو وسیم خان کا مزید کہنا تھا کہ  ہم نے گزشتہ پانچ سال انٹرنیشنل کرکٹ کی مکمل بحالی کے لیے بہت محنت کی ہے، میں اور چیئرمین پی سی بی رمیز راجہ  انٹرنیشنل کرکٹ کونسل پر یہ معاملہ اٹھائیں گے۔