ہم سمجھتے ہیں کہ صرف طوطا ہی انسانی آواز کی نقل کرسکتا ہے لیکن آسٹریلیا کے ٹارونگا چڑیا گھر میں ایک پرندہ ہے جو کسی نوزائیدہ بچے کے رونے جیسی آواز سمیت کئی طرح کی مزید آوازیں بھی نکال سکتا ہے۔

سڈنی میں واقع ٹارونگا چڑیا گھر پچھلے کئی مہینوں سے کورونا وباء کی وجہ سے عوام کے لئے بند ہے لیکن وہاں موجود جانوروں اور پرندوں کی دیکھ بھال کے لئے چڑیا گھر کا عملہ اپنے فرائض انجام دے رہا ہے۔

اسی چڑیا گھر میں سپرب لائربرڈ کہلانے والا ایک آسٹریلوی پرندہ بھی ہے ،اس میں اپنے ماحول سے سیکھنے اور دوسروں کی نقل اتارنے کی حیرت انگیز صلاحیت ہے جس کا مظاہرہ یہ اکثر کرتا رہتا ہے۔

https://twitter.com/tarongazoo/status/1432489666897453057?ref_src=twsrc%5Etfw%7Ctwcamp%5Etweetembed%7Ctwterm%5E1432489666897453057%7Ctwgr%5E%7Ctwcon%5Es1_&ref_url=https%3A%2F%2Fwww.express.pk%2Fstory%2F2220587%2F509

ٹارونگا چڑیا گھر کا عملہ چند روز قبل یہ دیکھ کر حیران رہ گیا کہ یہ پرندہ کسی انسانی بچے کے رونے جیسی آواز میں چیخ رہا تھا۔

عملے کے ایک رکن نے فوراً اپنے اسمارٹ فون کیمرے سے ویڈیو بنالی جسے چڑیا گھر کے آفیشل ٹوئٹر اکاؤنٹ پر بھی شیئر کردیا گیا۔

اس ویڈیو کو تقریباً پانچ لاکھ سوشل میڈیا صارفین دیکھ چکے ہیں اور اس پر سیکڑوں کی تعداد میں تبصرے بھی کرچکے ہیں۔

ایک ٹوئٹر صارف نے لکھا کہ اس آواز کو سن کر مائیں اپنے شیرخوار بچوں کو ڈھونڈنے نکل جائیں گی۔