اینٹی کرپشن ، محکمہ مال اور پولیس کی جانب سے قبضہ مافیا کے خلاف تین بڑی کارروائیاں کی گئی ہیں۔

تفصیلات کے مطابق  کارروائی کے نتیجے میں کروڑوں روپے مالیت کی کمرشل و زرعی سرکاری اراضی واگزار کرالی گئی ہیں۔

ڈی جی اینٹی کرپشن پنجاب کا کہنا ہے کہ  اوکاڑہ میں اینٹی کرپشن کی سربراہی میں قبضہ گروپ کے خلاف گرینڈ آپریشن کیا گیا ہے، قبضہ مافیا سے 96 کنال  سرکاری اراضی واگزار کرالی گئی ہے۔

ڈی جی اینٹی کرپشن پنجاب نے بتایا کہ واگزار کرائی گئی زمین کی مالیت 2 کروڑ 40 لاکھ روپے ہے۔

اسکے علاوہ  قبضہ مافیا کے خلاف دوسری کارروائی سرگودھا کے علاقے چکنمبر 109 میں کی گئی ہے، سرگودھا سے 1 کروڑ 29 لاکھ سے زائد مالیت کی 59 کنال سرکاری اراضی واگزار کرالی گئی ہے۔

 ڈی جی اینٹی کرپشن پنجاب کے مطابق قبضہ مافیا کے خلاف تیسری کارروائی وہاڑی میں کی گئی ہے، وہاڑی میں قبضہ گروپ نے 10 مرلہ کمرشل سرکاری پراپرٹی پر پیٹرول پمپ بنا رکھا تھا۔

 ڈی جی اینٹی کرپشن پنجاب کا کہنا تھا کہ پیٹرول پمپ گرا کر واگزار کرائی گئی زمین کی مالیت 1 کروڑ 75 لاکھ روپے ہے۔

ڈی جی اینٹی کرپشن پنجاب نے بتایا کہ قابضین سے تاوان کی وصولی یقینی بنائی جائے گی اور تاوان کے تعین اور وصولی کے لیے محکمہ مال کو ہدایات بھی جاری کردی گئی  ہیں۔

واضح رہے کہ پنجاب بھر میں قبضہ مافیا کے خلاف بلا امتیاز کارروائیاں جاری ہیں۔