کراچی میں پولیس نے جرائم کی روک تھام کیلئے کارروائیاں کی ہیں جن میں 963 سے زائد ملزمان کو گرفتار کرلیا گیا ہے۔

تفصیلات کے مطابق پولیس نے شہر میں جرائم کی روک تھام، اسٹریٹ کرمنلز، منشیات فروشوں اور مفرور ملزمان کو گرفتار کرلیا ہے۔

ذرائع نے بتایا ہے کہ پولیس نے گزشتہ ہفتے کراچی کے ایسٹ، ویسٹ اور ساوتھ ذون میں چھاپوں کے دوران مجموعی طور پر 963  سے زائد ملزمان کو گرفتار کیا ہے۔

ذرائع نے بتایا ہے کہ پولیس کیجانب سے منشیات کیخلاف جاری مہم کے دوران مختلف علاقوں سے کروڑوں روپے مالیت کی 259 کلو 708 گرام چرس، 03 کلو 86 گرام ہیروئن اور 5 کلو 32 گرام آئس برآمد کی گئی ہے۔

ذرائع نے بتایا ہے کہ گرفتار اسٹریٹ کرمنلز سے شہریوں سے لوٹ مار اور دیگر وارداتوں میں استعمال شدہ 82  سے زائد مختلف اقسام کا غیر قانونی اسلحہ بمعہ ایمونیشن تحویل میں لے لیا گیا ہے۔

ذرائع نے بتایا ہے کہ شہر میں انسداد جرائم کے دوران ملزمان سے پولیس کے 08 مقابلے ہوئے، فائرنگ کے تبادلے میں 01  ڈاکو ہلاک جبکہ 09 زخمیوں سمیت 14 ڈاکوؤں کو گرفتار کیا گیا ہے، گرفتار ڈاکوؤں سے 05 موٹرسائیکلیں اور 11 پستول بمعہ لوڈ میگزین برآمد ہوئے جسے فارنزک کیلئے روانہ کر دیا گیا ہے۔

ذرائع نے بتایا ہے کہ اسپیشل انویسٹیگیشن یونٹ کراچی نے مختلف کارروائیوں کے دوران 06 ملزمان کو گرفتار کر کے 02 پستول بمعہ لوڈ میگزین، 04 کلو 170 گرام چرس اور 235 گرام ہیروئین برآمد کی ہے اس کے علاوہ کراچی پولیس نے مختلف علاقوں میں کارروائیاں کرتے ہوئے مجموعی طور پر 45 چھینی و چوری شدہ موٹرسائیکلیں اور 02 گاڑیاں تحویل میں لے لی ہے۔

کراچی پولیس کے ترجمان کا اس ضمن میں کہنا ہے کہ کراچی پولیس کیجانب سے جرائم کے خاتمے، امن وامان کی بحالی اور عوام کے تحفظ کیلئے کئے جانے والے اقدامات جاری رہینگے۔