پاکستان میں تعینات انڈونیشیاء کے سفیر آدم ملاورمین ٹگیو نے اسلام آباد چیمبر آف کامرس اینڈ انڈسٹری کا دورہ کیا ہے۔

تفصیلات کے مطابق دورے میں  تاجر برادری سے دو طرفہ تجارت اور باہمی دلچسپی کے امور پر تبادلہ خیال کیا گیا ہے۔

انڈونیشیاء کے سفیر آدم ملاورمین ٹگیونے کہا کہ آسیان خطہ پاکستان کے لیے بہت بڑی مارکیٹ ہے، پاکستان انڈونیشیاء کے ساتھ قریبی تعاون فروغ دے کر آسیان ممالک کے ساتھ اپنی تجارت و برآمدات کو بہتر فروغ دے سکتا ہے۔

 انہوں نے کہا کہ چین کی آسیان کے ساتھ باہمی تجارت  600 ارب ڈالرتک ہے جبکہ  پاکستان کی آسیان خطے کے ساتھ دو طرفہ تجارت صرف 6 ارب ڈالر تک ہے جو حوصلہ افزا نہیں ہے۔

ان کا کہنا تھا کہ پاکستان اور انڈونیشیا میں بہت سی مماثلتیں ہیں جنہیں باہمی معاشی فوائد حاصل کرنے کے لیے استعمال کیا جانا چاہیے۔

اس موقع پر اپنے خیالات کا اظہار کرتے ہوئے سردار یاسر الیاس نے کہا کہ انڈونیشیا اور پاکستان کے درمیان دو طرفہ تجارت، سرمایہ کاری اور اقتصادی تعاون کے بے پناہ امکانات موجود ہیں۔

انہوں نے کہا کہ انڈونیشیا اور پاکستان کے درمیان موجودہ تجارت صرف 2.5 بلین ڈالر کے لگ بھگ ہے جو کہ ان کی اصل صلاحیت کی عکاس نہیں ہے۔

انہوں نے مزید کہا کہ پاکستان فارماسوٹیکلز، آلات جراحی، فوڈ پراڈیکٹس، آئی ٹی اور لائٹ انجینئرنگ سمیت متعدد مصنوعات انڈونیشیاء کو برآمد کر سکتا ہے۔

سردار یاسر الیاس نے یقین دلایا کہ آئی سی سی آئی انڈونیشیا کے سفارت خانے کے ساتھ مل کر دونوں ممالک کے درمیان طلباء کے تبادلے اور کاروباری روابط کو فروغ دینے کیلئے تیار ہیں۔