اسپیکر پنجاب اسمبلی چوہدری پرویزالہٰی نے کہا ہے کہ ہم نے ہمیشہ مظلوموں کی مدد کرنا اپنا اولین فرض سمجھا ہے۔

تفصیلات کے مطابق اسپیکر پنجاب اسمبلی چوہدری پرویزالہٰی نے سعودی عرب میں منعقدہ چوہدری ظہورالہٰی شہید کی 40ویں برسی کی تقریب سے ویڈیو لنک کے ذریعے خطاب کرتے ہوئے کہا کہ تحفظ ختم نبوتﷺ کی تحریک چلانا اور قادیانیوں کو غیر مسلم قرار دلوانا چوہدری ظہورالہٰی شہید کا بڑا کارنامہ ہے۔

چوہدری پرویزالہٰی کا کہنا ہے کہ خادم حرمین شریفین شاہ سلمان بن عبدالعزیز اور ولی عہد شہزادہ محمد بن سلمان کی پاکستان محبت قابل قدر ہے، شہزادہ محمد بن سلمان نے پاکستان کے دورہ پر کہا تھا کہ میں پاکستان کا سفیر ہوں۔

اسپیکر پنجاب اسمبلی نے کہا ہے کہ چوہدری ظہورالہٰی شہید نے کبھی عوامی خدمت اور اصولوں پر سمجھوتہ نہیں کیا، چوہدری شجاعت حسین کی سربراہی میں ہمارا خاندان ظہورالہٰی شہید کے مشن کو لے کر آگے چل رہے ہیں۔

انہون نے کہا کہ چوہدری ظہورالہٰی شہید نے ساری زندگی عوام کے حقوق کے حصول کیلئے جدوجہد کی، ہر سال برسی کے موقع پر ہم اپنے آپ سے عہد کرتے ہیں کہ یا اللہ ہم سے ایسے کام لے جس سے تو اور تیری مخلوق راضی ہو۔

چوہدری پرویزالہٰی نے کہا ہے کہ ہم نے ہمیشہ مظلوموں کی مدد کرنا اپنا اولین فرض سمجھا ہے، آج بھی لوگ چوہدری ظہورالہٰی شہید کے خاندان کا نام عزت و احترام سے لیتے ہیں۔

اسپیکر پنجاب اسمبلی چوہدری پرویزالہٰی نے مزید کہا ہے کہ صدر مسلم لیگ سعودی عرب چوہدری اظہر وڑائچ کا شکریہ جن کی صدارت میں چوہدری ظہورالہٰی شہید کی برسی کی تقریب کا انعقاد کیا گیا، انہوں نے پیرس، اسپین اور جرمنی سمیت پاکستان کے مختلف شہروں میں چوہدری ظہورالہٰی شہید کی برسی کا انعقاد کرنے پر تمام مسلم لیگی رہنماؤں و کارکنوں کا بھی شکریہ ادا کیا۔