ایڈمنسٹریٹر کراچی و ترجمان سندھ حکومت بیرسٹر مرتضیٰ وہاب کا کہنا ہے کہ پانی کی کمی کو پورا کرنے کے لئے ڈی سیلینیشن پلانٹ کو بروئے کار لایا جائے گا۔

تفصیلات کے مطابق ایڈمنسٹریٹر کراچی و ترجمان سندھ حکومت بیرسٹر مرتضیٰ وہاب اور صوبائی وزیر بلدیات ناصر حسین شاہ کی سربراہی میں شہر بھر میں پانی کی قلت کے حوالے سے اہم اجلاس ہوا ہے۔

اجلاس میں ڈی ایچ اے اتھارٹیز کے ایڈمنسٹریٹر بریگیڈیئر رائے عاصم مصطفی اور پی سی آئی کے بریگیڈیئر یاسر الہٰی نے  شرکت کی ہے۔

ترجمان سندھ حکومت بیرسٹر مرتضیٰ وہاب نے کہا ہے کہ شہر بھر میں پانی کی کمی کو پورا کرنے کے لئے ڈی سیلینیشن پلانٹ اور دیگر آپشنز کو بروئے کار لایا جائے گا، پانی کی کمی کے معاملے پر ہنگامی بنیادوں پر کام کیا جائے گا۔

سندھ حکومت کی کوشش ہے کہ پانی کی تقسیم کو منصفانہ بنایا جائے، کوشش ہے کہ کراچی کے شہر وں کو پانی کی کمی کی شکایت نہ ہو۔

ایڈمنسٹریٹر کراچی و ترجمان سندھ حکومت بیرسٹر مرتضیٰ وہاب نے مزید کہا ہے کہ شہر میں پانی کی قلت ہے جس کی وجہ سے دیگر ذرائع استعمال کیے جائیں گے۔

دوسری جانب صوبائی وزیر بلدیات ناصر حسین شاہ نے کہا ہے کہ وفاقی وزراء سب اچھا ہے کی بانسری بجاتے ہیں ، سندھ کی بہتری کیلئے کوئی بھی پروجیکٹ شروع کریں ہم سپورٹ کریں گے۔

انہوں نے کہا کہ بارشوں کےدوران ایڈمنسٹریٹرکراچی سڑکوں پررہے، اس سال بارشوں کے دوران صورتحال کافی بہترتھی ، وفاقی وزراء اتنے جھوٹے ہیں، سیب کھارہے ہوں تو کہتے ہیں آڑو کھا رہے ہیں ، کے ایم سی کے 3 بڑے نالوں کی صفائی این ڈی ایم اے کررہا ہے۔

ناصر حسین شاہ نے کہا کہ 41 نالوں کی صفائی سندھ حکومت نے کروائی ، ڈی ایم سی کے 500 نالے بھی سندھ حکومت نے صاف کروائے ، پی ڈی ایم کی پوری جدوجہد وفاقی حکومت کے خلاف ہے۔

وزیر بلدیات سندھ ناصر حسین شاہ نے مزید کہا ہے کہ جتنا جلد ہوسکے وفاقی حکومت سے جان چھڑائی جائے ، سندھ حکومت صحافیوں کو سہولتیں فراہم کررہی ہے۔