پاکستان پی پی پی کے چیئرمین بلاول بھٹو زرداری نے کہا ہے کہ ہر دور میں پاکستان پیپلزپارٹی نے ملک کو مشکل سے نکالا ہے۔

تفصیلات کے مطابق پاکستان پی پی پی کے چیئرمین بلاول بھٹو زرداری کی یونین کمیٹی 08 لاہوری محلہ میں پارٹی کی سٹی تنظیم کے سینئر نائب صدر سرفراز کھوکھر کی رہائش گاہ آمد ہوئی۔

اس موقع پر پاکستان پی پی پی کے چیئرمین بلاول بھٹو زرداری نے یوسی صدر جلیل احمد میمن اور جنرل سیکریٹری گدا حسین سومرو کی میزبانی میں ہونے والے کارکنان و عہدیداران کے اجلاس کی سربراہی کی جبکہ چیئرمین بلاول بھٹو زرداری نے عطا محمد میمن سے ان کے بھائی فیاض میمن اور جلیل احمد میمن سے ان کے عزیز غلام رسول میمن کے انتقال پر تعزیت کی۔

پاکستان پی پی پی کے چیئرمین نے اپنے حلقہ انتخاب کے مسائل کو جیالوں سے براہ راست سنا، حل کے لئے فوری ہدایات جاری کیں۔

بلاول بھٹو زرداری نے جیالوں سے گفتگو کرتے ہوئے کہا کہ آپ بھٹو شہید کے پڑوسی ہو، آپ میرے سفیر ہو، میرے بازو اور کان ہو۔

پاکستان پی پی پی کے چیئرمین کا کہنا تھا کہ میرے لئے یہ قیمتی لمحات ہیں کہ انہی گلیوں میں گھوم رہا ہوں جہاں بھٹو شہید، مادر جمہوریت اور بی بی شہید آیا کرتے تھے، میرا آپ کے پاس آنا دراصل نسلوں سے وفا کے اسی رشتے کا ایک تسلسل ہے۔

بلاول بھٹو زرداری نے کہا کہ ہر دور میں پاکستان پیپلزپارٹی نے ملک کو مشکل سے نکالا ہے، پاکستان پیپلزپارٹی نے غریب عوام کو آواز دی، مزدوروں اور کسانوں کو حقوق دیئے۔

پاکستان پی پی پی کے چیئرمین بلاول بھٹو زرداری نے مزید کہا کہ ایک بار پھر پاکستان مشکل میں ہے۔ آج ملک میں مہنگائی، بے روزگاری اور غربت تاریخ کی بلند ترین سطح پر ہے اور ہماری ذمہ داری ہے کہ عوام کو مشکلات سے نجات دلائیں۔