وزیراعظم آزاد جموں وکشمیر سردار عبد القیوم نیازی کا کہنا ہے کہ ڈبلیو ایچ او کی دنیا بھر میں صحت کے شعبے میں گراں قدر خدمات ہیں۔

عبد القیوم نیازی سے ورلڈ ہیلتھ آرگنائزیشن کے کنٹری ہیڈ پلیتھا ماہی پالا کی ملاقات ہوئی جس میں آزاد کشمیر میں شعبہ صحت کی اپ گریڈیشن اور بہتری سے متعلق امور پر تبادلہ خیال کیا گیا۔

ڈبلیو ایچ او کے کنٹری ہیڈ نے آزاد کشمیر میں ہیلتھ سیکٹر میں بھرپور تعاون کی یقین دہانی کروائی۔

ڈبلیو ایچ او کے کنٹری ہیڈ نے آزاد کشمیر کیلئے فوری طور 9 ایمبولینسز اور 6 گاڑیاں ویکسینیشن کیلئے فراہم کرنے کا اعلان کیا ہے۔

کنٹری ہیڈ پلیتھا ماہی پالا نے کہا ہے کہ آزاد کشمیر کے5  بی ایچ یو کیلئے طبی ساز و سامان بھی فراہم کریں گے  اور آزاد کشمیر میں ترجیحی بنیادوں پر 2 ویکسینیشن سینٹر بھی قائم کریں گے۔

انہوں نے کہا کہ آزاد کشمیر میں صحت کے شعبے کو جدید تقاضوں سے ہم آہنگ بنانے کیلئے بھرپور تعاون فراہم کریں گے۔

دوسری جانب وزیراعظم سردار عبد القیوم نیازی نے ڈبلیو ایچ او کی پاکستان سمیت دنیا بھر میں خدمات کو سراہتے ہوئے کہا کہ آزاد کشمیر کی آبادی کا ایک بڑا حصہ ایل او سی پر آباد ہے جہاں صحت کی سہولیات کا فقدان ہے۔

انہوں نے کہا کہ کورونا وائرس کے باعث گزشتہ دو سالوں میں آزاد کشمیر کی عوام کو بے پناہ سماجی و معاشی مسائل کا سامنا ہے، آزاد کشمیر میں شعبہ صحت کو جدید خطوط پر استوار کرنے کیلئے جہاں وسائل کی ضرورت ہے وہیں ٹیکنیکل تعاون درکار ہے۔

عبد القیوم نیازی نے کہا کہ ڈبلیو ایچ او کی دنیا بھر میں صحت کے شعبے میں گراں قدر خدمات ہیں، آزاد کشمیر کے شعبہ صحت کو جدید سہولیات سے آراستہ کرنے کیلئے ڈبلیو ایچ او جیسے اداروں کے تعاون کی ضرورت ہے۔