وزیر خارجہ شاہ محمود قریشی نے کہا ہے کہ افغانستان میں قیام امن کیلئے علاقائی سطح پر تعاون ناگزیر ہے۔

تفصیلات کے مطابق ایران کے وزیر خارجہ حسین امیر عبداللہیان کا وزیر خارجہ شاہ محمود قریشی سے ٹیلیفونک رابطہ ہوا جس میں دونوں وزرائے خارجہ کے مابین علاقائی بالخصوص افغانستان کی ابھرتی ہوئی صورتحال سمیت باہمی دلچسپی کے امور پر تبادلہ خیال ہوا۔

ٹیلیفونک رابطے کے دوران ایران کے وزیر خارجہ حسین امیر عبداللہیان نے وزیر خارجہ شاہ محمود قریشی کو اگلے ہفتے تہران میں متوقع، افغانستان کے قریبی ہمسایہ ممالک کے وزارتی سطح کے دوسرے اجلاس میں شرکت کی دعوت دی۔

اس موقع پر وزیر خارجہ شاہ محمود قریشی نے علاقائی سطح پر مشترکہ لائحہ عمل اپنانے کے حوالے سے پاکستان کے اقدام کی مکمل تائید اور حمایت پر ایرانی وزیر خارجہ کا شکریہ ادا کیا جبکہ وزیر خارجہ نے اس اہم اجلاس کے بروقت انعقاد پر ایرانی وزیر خارجہ کو مبارکباد بھی دی۔

وزیر خارجہ شاہ محمود قریشی نے توقع ظاہر کی کہ افغانستان کے قریبی ہمسایہ ممالک کے اجلاس کے انعقاد اور باہمی گفت و شنید سے علاقائی سطح پر تعاون کو مستحکم بنانے میں مدد ملے گی۔

شاہ محمود قریشی نے کہا کہ افغانستان کے حوالے سے ہمارے نقطہ نظر میں مماثلت اور ہم آہنگی خوش آئند ہے، افغانستان میں قیام امن کیلئے علاقائی سطح پر تعاون ناگزیر ہے۔

وزیر خارجہ شاہ محمود قریشی کا مزید کہنا تھا کہ افغانستان میں پنپنے والے معاشی بحران سے نمٹنے کیلئے مشترکہ کاوشیں بروئے کار لانے کی ضرورت ہے۔

واضح رہے کہ افغانستان کے قریبی ہمسایہ ممالک کا اولین اجلاس، 8 ستمبر 2021 کو، پاکستان کی دعوت پر بذریعہ ویڈیو لنک منعقد ہوا، اس اجلاس میں پاکستان،چین،ایران ،تاجکستان ،ترکمانستان اور ازبکستان کے وزرائے خارجہ نے شرکت کی اور اجلاس کے بعد ایک متفقہ اعلامیہ بھی جاری کیا گیا ہے۔