پی ٹی آئی رکن سندھ اسمبلی راجہ اظہر کی گورنر سندھ عمران اسماعیل سے ملاقات ہوئی ہے۔

ملاقات میں راجہ اظہر نے اپنے حلقے کے مسائل سمیت دیگر امور پر گورنر سندھ سے گفتگو کی جبکہ راجہ اظہر نے گورنر سندھ کو حلقے میں پانی، گیس اور دیگر مسائل سے بھی آگاہ کیا۔

اس موقع پر گورنر سندھ عمران اسماعیل نے راجہ اظہر کے عوامی مسائل پر کردار کو سراہا۔

 واضح رہے اس سے قبل گورنر سندھ عمران اسماعیل نے گورنر ہاؤس سندھ میں میمن لیڈرشپ فورم ورلڈ کونسل کی لانچنگ تقریب سے خطاب کرتے ہوئے کہا تھا کہ میمن برادری کا قیام پاکستان سے لے کر پاکستان کی تعمیر و ترقی میں اہم کردار رہا ہے۔

اس موقع پر گورنر سندھ عمران اسماعیل نے کہا تھا کہ میمن برادری کی سماجی اور فلاحی کاموں میں بھی قابل قدر خدمات ہیں، عالمی سطح پر میمن فورم کو وسعت دینے سے ملک کی معیشت کو بھی فروغ حاصل ہو گا۔

گورنر سندھ عمران اسماعیل نے مزید کہا تھا کہ امید کرتا ہوں میمن لیڈر شپ فورم ورلڈ کونسل کے ممبران ملک میں ترقی کے فروغ میں اپنی بہترین صلاحیتوں کو بروئے کار لائیں گے۔

تقریب سے خطاب کرتے ہوئے صدر میمن لیڈرشپ فورم  عبدالرحیم جانوں کا کہنا تھا کہ میمن لیڈرشپ فورم ورلڈ کونسل میں ۵۵ دیگر ممالک شامل ہیں، میمن لیڈر کے تحت ورلڈ کونسل کی لانچنگ کا بنیادی مقصد ملک کی معیشت کو مستحکم کرنے میں فعال کردار ادا کرنا ہے۔